El grupu d’agrofolk-rock Raigañu asoleyó el so quintu cantar: ‘Agromoza‘ 
Esti tema caracterízase pola inclusión de la flauta, por ser el que tien un ritmu más sele y por caltener l’humor y la crítica social nel so mensaxe: «Ye un cantar con ironía y retranca qu’invita a pensar qué ye realmente importante y hasta qué puntu tamos dispuestos a renunciar a ello por encaxar«, desplica Llarvi Varela, vocalista de la formación. Musicasturiana.com
El grupu d’agrofolk-rock Raigañu asoleyó’l xueves 30 d’abril el so quintu cantar: ‘Agromoza‘. Esti tema aporta dempués de los singles ‘Llingua de paletos‘, ‘Fala con to güela‘, ‘Gaites nel Carrefour’ y ‘Paisanos mal fechos’ y caracterízase pola inclusión de la flauta, por ser el que tien un ritmu más sele y por caltener l’humor y la crítica social nel so mensaxe: «Ye un cantar con ironía y retranca qu’invita a pensar qué ye realmente importante y hasta qué puntu tamos dispuestos a renunciar a ello por encaxar«, desplica Llarvi Varela, vocalista de la formación.
«Naz como una crítica directa a los estereotipos sociales que marquen lo que se supón que tenemos que ser: la obsesión pola imaxe, les modes pasaxeres, la fama vacía y los modelos prefabricaos que s’imponen dende fuera. Dende una mirada sutil, esti cantar pon el focu en cómo, especialmente ente la xente mozo, van dexando de valorar coses importantes al tar más pendientes d’eses referencies impuestes y d’un ideal que munches vegaes ye inalcanzable«, añade’l fundador de Raigañu.
D’esa manera, el músicu sorraya que ‘Agromoza’ «fala de nun infravalorar, de nun “apaletar” lo propio, lo que somos, frente a lo que vien empaquetao como lo que debería ser. Ye, en resume, una llamada a cuestionar lo que damos por válido. Ye una llamada a que la vida rural sea tan sensual como la cosmopolita o más«.
Discu nunes selmanes
L’orixe de raigañu remóntase a payares del pasáu añu, anque nun foi hasta febreru d’esti cuando completaron la formación. Musicalmente’l grupu presenta una propuesta orixinal, qu’amesta folk y punk-rock con muncho protagonismu de los vientos, mesmo de la gaita asturiana como de los vientos metales. A too ello súmen-y la estaya «agro«, por mor de que tolos sos componentes vienen del rural, un mundu que reivindiquen y al que miren nes sos lletres.
El próximu 20 de mayu tienen intención de llanzar el so primer discu y llueu entamar colos conciertos: 28 de mayu la presentación del álbum na Chalana (Llaviana), 12 de xunu en Blimea, 27 de xunu en Suares (Bimenes) y otres feches que tán zarrando. Con Raigañu medra la escena de rock n’asturianu gracies a una banda que sigue’l camín de referentes como Los Berrones, Avientu, Spanta la Xente o Skama la Rede y presenta una propuesta a mediu camín ente toos ellos.
