Un 25% de los mozos siente soledá y falta de pertenencia.
Vivir na dómina dixital nun evita sentir soledá y al contrario de lo que se piensa, los que más tienen esi sentimientu son los mozos. De media un 25% de los que tienen ente 16 y 26 años afirma sentir falta d’enraigonamientu y pertenencia, muncho más inclusive que les persones d’edá más avanzada.Ye la conclusión d’un estudiu presentáu güei nes terceres xornaes sobre la soledá y salú en mozos y mayores na Universidá d’Uviéu.
La dixitalización pue ser una oportunidá pero tamién una forma d’esclusión. Un 25% de los mozos que participaron nel estudiu afirma sentir diferentes formes de soledá, cifra qu’aumenta nel casu de les moces. El tiempu de conexón a la rede, la redolada, la cohesión social y la participación influyen.
Les persones ensin llar o con discapacidá, y los que tienen problemes de salú mental sienten mayor soledá.
Nes xornaes entamaes pola Universidá d’Uviéu, estudiantáu internacional y espertos de Suecia, Italia y Alemaña xuniéronse a los de la institución asturiana pa tocar esti desafíu.
La integración y la inclusión, asina como les lluches escontra’l racismu y l’edadismu al traviés de polítiques preventives, apunten los espertos, podríen amenorgar malestares emocionales como congoxa y sentimientos de murnia y soledá.
UNICEF alerta de que la protección de la infancia na redolada dixital ye insuficiente y pide reformes urxentes
Nesa xornada, dende UNICEF aseguraron que les midíes de protección de la infancia nel ámbitu dixital son insuficientes.
Piden revisar y reformar los marcos normativos pa evitar casos como los presuntos casos d’abusu sexual infantil en TikTok y que la Fiscalía yá ordenó investigar.
Creen que tanto les compañíes como les families tienen que tomar midíes más rápides.
