Los maestros del horru piden que se reconoza’l so oficiu.
Non solo basta con saber trabayar la madera. Restaurar un horru esixe conocer la so estructura, les sos proporciones y hasta los pequeños detalles que lo faen únicu.
Una conocencia que se deprende sobre manera cola esperiencia. Y que güei tien un problema: el relevu xeneracional.
Hai trabayu, pero la combinación ente unos costos cada vez más altos y un oficiu duru físicamente, fai que dellos profesionales cambien a la construcción d’obra nueva.
Poro, reclamen que se reconoza una figura que, pel momentu, solo esiste de manera popular: la del maestru horreru. Una reivindicación que garra inda más importancia cola reforma que va dexar nuevos usos. Por ello, piden una reconocencia profesional y meyores condiciones llaborales.
Una demanda que tien que ver tamién col caltenimientu d’estos elementos, porque si falten profesionales capaces d’intervenir nellos, caltener el patrimoniu vuélvese cada vez más difícil.
