🌡️ Espérase qu’Uviéu llegue a los 36 graos, superando la máxima histórica de 35,5 de xunu del añu 2000.
Si la fola de calor del pasáu mes de mayu yá foi estrema y batió récords de temperatures, la que vien agora va ser entá mayor.
L’Axencia Estatal de Meteoroloxía (AEMET) alerta de la entrada, esta fin de selmana, d’aire templao proveniente del sur, dando llugar a un domingu de bien de chorna en tol país.
Asina, espérase que la rexón raspie, per primer vegada anguaño, los 40 graos. Según les previsiones (que suelen superase), Cangas va llegar a los 39, Llangréu a los 37, Uviéu a los 36, Xixón a los 30 , Avilés y Llanes a los 29, y Navia a los 28.
Nel pasáu mes de mayu, cuando Asturies tuvo una selmana so una fola de calor intenso, algamóse una temperatura récord de 36,3 en Mieres. Les cifres que s’esperen para esti domingu son cimeros y probablemente van volvese a bater récords. La máxima histórica rexistrada nun mes de xunu n’Uviéu fueron 35,5 graos el 16 de xunu del 2000.
L’AEMET avisa de qu’en delles zones del país podríen rexistrase esti domingu temperatures enxamás reparaes para la dómina del añu. La que vien va ser la primera gran fola del branu, pos la nueva estación entra xusto’l domingu, a les 9.24 hores.
Xubida de 6 graos nel Cantábricu «Polo xeneral, los cielos van tar estenos o con delles nubes altes, salvu nes mariñes del noroeste, onde s’esperen nubes baxes; pela tarde podríen apaecer nubes d’evolución esvalixaes en zones del centru peninsular que dexen dalgún bastiu aislláu.
Les temperatures van xubir de forma xeneralizada, especialmente nel casu de les máximes nel Cantábricu, onde s’esperen ascensos de más de 6 graos», detalla la AEMET. Les mínimes van rondar el domingu na rexón los 19 graos.
