El colexu del barriu xixonés de Nuevu Roces va llevar el nome de la poetisa Xosefa de Xovellanos y va abrir en septiembre con tolos cursos d’Infantil y Primaria. Educación aprueba la creación alministrativa del centru, que va empezar la so andadura con once unidaes: dos para’l primer nivel de cada etapa y un grupu para’l restu. Xixón al día / Actualidá
La poetisa Xosefa de Xovellanos va poner nome al nuevu colexu d’educación Infantil y Primaria (CEIP) que’l Gobiernu d’Asturies constrúi nel barriu xixonés de Nuevu Roces. L’Executivu autonómicu acaba d’aprobar la creación alministrativa d’esti centru que, finalmente, va inaugurase en septiembre con tolos cursos de dambes etapes.
L’equipamientu supon la mayor inversión del Principáu nun centru públicu d’Infantil y Primaria, con un presupuestu de 16,5 millones. A esa cifra hai que sumar los más de 140.000 euros del moblame previstu para cubrir les necesidaes del cursu inaugural.
El colexu va empezar la so andadura con once unidaes: cuatro d’Infantil y nueve de Primaria. Va haber dos unidaes nel primer cursu de cada etapa (Infantil de 3 años y 1º de Primaria), ente que’l restu de niveles va disponer d’una unidá.
Con esa distribución prevese dar respuesta a les 203 solicitúes rexistraes mientres el periodu d’almisión para’l cursu 2026-2027. De cara al futuru, el colexu ta habilitáu para allugar hasta 27 unidaes: 9 d’Infantil y 18 de Primaria.
L’alumnáu va tar adscritu al Institutu de Secundaria de Roces, ente que la unidá de Secretaría asignóse al Colexu Nicanor Piñole, del barriu de Contrueces. Nesti centru yá se realizó’l periodu d’almisión y tamién se va formalizar, en xunu, la matriculación.
Dirección y profesoráu
Per otru llau, la conseyería tien en marcha’l procedimientu para nomar, con calter estraordinariu, a la persona encargada de dirixir el colexu, en réxime de comisión de servicios. Tocantes a la composición del claustru, va dase prioridá al profesoráu del CP Nicanor Piñole y el restu de vacantes va completase con personal interino hasta cubrir les necesidaes. Esti procesu va ser similar al realizáu cola apertura del Institutu Margarita Salas, del barriu uvieín de La Corredoria.
Tocantes a la nominación oficial, el centru va rindir homenaxe a Xosefa de Xovellanos (1745-1807), considerada la pionera de la poesía en llingua asturiana. La so vida escurrió ente Madrid y Xixón, onde remató los sos díes como agustina recoleta nun conventu del barriu de Cimavilla. Yera hermana del pernomáu Gaspar Melchor de Xovellanos, con quien tuvo bien xunida. Esta escritora yá da nome a un premiu de novela n’asturianu convocáu pol Gobiernu d’Asturies.
