Publicado en Música, Premios

Tania Pereira conquista’l XVIII Premiu Camaretá

Tania Pereira conquista’l XVIII Premiu Camaretá al meyor cantar. / ‘Piquena’ ye unu cantar de raíz folk abierta a soníos contemporaneos. El premiu ta dotáu con 6.000 euros, la producción d’un videoclip y l’incorporación al circuitu ‘Autores nel Camín’.

Tania Pereira, del suroccidente asturianu a la escena británica

Orixinaria de Xedré, en Cangas, Tania Pereira empezó la so trayectoria musical collaborando col so padre, el tamién cantautor Pedru Pereira, como integrante de la formación de folk tradicional Brandal. Con esta banda participó nel Festival Intercélticu de Lorient y recibió delles nominaciones a premios de la escena musical asturiana.

 

La so carrera en solitariu arrincó en treslladándose a Londres, ciudá na que moró mientres dellos años y que la so escena musical influyó especialmente nel soníu del so primer discu, Un suañu dientro d’un suañu. Esti trabayu valió-y el premiu AMAS a la meyor voz en 2020. En 2025 publicó Rousa de Xericó y, a lo llargo de la so trayectoria, collaboró con artistes y formaciones de la escena asturiana como Ferla Megía, De FEM y Tigre y Diamante. La so propuesta combina’l raigañu folk con influencies del rock alternativu, el indie y el pop, una confluencia d’estilos que se reflexa en Piquena, cantar ganador del XVIII Premiu Camaretá al Meyor Cantar.

L’artista alzóse esta nueche col galardón nuna gala celebrada nel Teatru de la Llaboral de Xixón, na que tamién defendieron en directu los sos cantares finalistes Marisa Valle Roso, Sólo y Ochobre.
Solo
Ochobre

Un premiu para impulsar la música n’asturianu y eonaviego

El Gobiernu d’Asturies convoca dende 2007 el Premiu al Meyor Cantar pa reconocer la creación musical n’asturianu y eonaviego y favorecer que nuevos cantares nes llingües propies atopen espaciu y públicu. El certame ta abiertu a cualquier xéneru musical y valora la composición, la interpretación y la corrección llingüística.

Dende 2020, el galardón lleva’l nome de Camaretá, n’alcordanza de la primer agrupación musical y lliteraria del Surdimientu, nacida en Samartín del Rei Aurelio en 1975 y de la que nacieron músicos y escritores venceyaos a la renovación cultural asturiana, como Nuberu, Nel Xiblata, Manuel Asur o Xuan Marcos.

Nes sos dieciocho ediciones, el premiu foi dexando una semeya bien diversa de la música creada n’asturianu y eonaviego, con cantares d’autor, tonada, rock, folk, música tradicional y propuestes electróniques. Ente los sos ganadores figuren Rodrigo Cuevas, Anabel Santiago, Alfredo González, Algaire, Vero Rubio, La Bonturné y Ferla Megía, ente otros.

Autor:

Maestra de Llingua Asturiana Colexu Carmen Ruiz-Tilve - Uviéu