Marco de la Rasilla, arqueólogu: «El Sidrón ye unu de los xacimientos más importantes del mundu». «Lo más sorprendente ye la cantidá de restos calteníos, porque lo normal ye que se pierdan; tenemos más de 2.500 entraes d’inventariu de restos humanos y unes 400 d’industria lítico, esto ye, ferramientes de piedra», afirma.
Marco de la Rasilla (Madrid, 1957), prehistoriador y arqueólogu, abre esti miércoles a les 17.00 hores nel edificiu de La Benéfica (Piloña) el cursu de branu «Los Neandertales d’El Sidrón nel so contestu evolutivu» con una ponencia sobro esta tema. De la Rasilla ye unu de los mayores espertos sobro’l xacimientu d’El Sidrón (Piloña).
–¿Cuánto tiempu lleva investigando n’El Sidrón?
–Dende l’añu 2000. Unos espeleólogos xixoneses atoparon restos humanos nos años 90 y empecipióse un procesu xudicial. Los güesos fueron unviaos al anatómicu forense. Ellí analizarense y en 1998 salió a la lluz qu’había güesos humanos. A partir d’ende empecipióse un proyectu en 1999 y nel añu 2000 arrincó tou. La investigación sigue inda güei.
–¿Qué toparon esactamente?
–Trelce individuos de distintos sexos y edaes, emparentaos, que fueron canibalizados. Lo que nun sabemos, porque nun hubo abonda amuesa, ye’l parentescu esactu: si yeren, por casu, madre y fíu. Había dos xuveniles, trés adolescentes y siete adultos. Nun hai evidencies d’un asentamientu fixu; probablemente taben na zona y otru grupu llegó y los canibalizó. ¿La razón? Puede ser qu’invadieren el so territoriu, yá que s’hai documentado la patrilocalidad (los homes permanecíen y les muyeres movíense o yeren movíes). Tamién pudo debese a un actu de violencia o a hambruna.
–¿Qué duldes persisten?
–El Sidrón ufiertó información novedosa y reforzó otros afayos. Pero entá hai entrugues abiertes: la estinción de los neandertales, les anomalíes conxénites, la baxa variabilidá xenética y el tamañu de les poblaciones. En cuanto al mundu simbólicu, hai nicios, pero tienen de confirmase. Nesti sentíu, El Sidrón nun ayudó demasiao porque los restos presenten señales clares de canibalismu, ensin elementos rituales.
–¿Qué tenemos comprobáu sobro’l canibalismu?
–Que nun foi específicu. Afectó a toles edaes y a dambos sexos. Nun hai señales de ritual; pensamos que foi un canibalismu por violencia o fame. La violencia ye malo de demostrar: un golpe puede romper un güesu ensin dexar claro’l motivu.
–¿Qué importancia tien El Sidrón na prehistoria asturiana?
–Ye unu de los xacimientos más importantes a nivel nacional ya internacional, ensin dulda.
–¿Qué-y sosprendió más tres tantos años d’investigación?
–El cúmulu d’afayos. Lo más sorprendente ye la cantidá de restos calteníos, porque lo normal ye que se pierdan. Tenemos más de 2.500 entraes d’inventariu de restos humanos y xunas 400 d’industria lítico, esto ye, ferramientes de piedra.
–¿Había muyeres ente los restos?
–Sí, cinco. Nos dientes afayáronse pequenes diferencies en buelgues y estríes que suxuren xuna cierta distribución sexual de xeres. Nun sabemos esactamente cuálos yeren, pero quiciabes había actividaes realizaes más por muyeres. Aun así, polo xeneral, toos faíen de too.
–¿De qué s’alimentaben?
–De vexetales y carne. Lo interesante ye que, siquier nos neandertales del sur, había un mayor consumu de vexetales comparáu colos del norte.
Unu de los individuos tenía un fuerte dolor na boca. ¿Cómo lo afayaron?
–Foi fácil. Nun quexal reparamos qu’uno de los caninos definitivos nun saliera, quedando’l de lleche. Eso provocólu una infección con aguadía, asina que debió d’esperecer dolor. Nél, y n’otros, topamos señales de automedicación: consumieron penicilina procedente d’hongos, lo qu’amuesa una conocencia fonda de los vexetales. Amás, ese mesmu individuu tenía una bacteria qu’afectaba a la visícula..
¿Qué tán faciendo anguaño?
Per un sitiu, reforzamos l’espardimientu del xacimientu, daqué incluyíu nel protocolu d’actuación de tolos equipos implicaos. Por otru, con esti cursu de branu —el primeru que s’entama— buscamos tresmitir de manera didáctica, comprensible y científica tola información disponible.
