El colectivu de confreríes d’Asturies señala que la pasada campaña foi «la peor que se recuerda y que ta documentada» y refuga que la razón de la escasez del cefalópodu sía la sobrepesca porque cada vez se dediquen menos embarcaciones a la captura. La Voz Galicia / La Voz /
El pulpu, unu de los mariscos más apreciaos gastronómicamente falando y que supon un sustentu perimportante para munches embarcaciones artesanales, paez sumir de la mariña cantábrica asturiana. Asina lo sollerten los pescadores de la rexón, que falen d’una escasez ensin precedentes que yá se dexó sentir na última campaña.
«Nun hubo nada de pulpu», llamenta Adolfo García, presidente de la Federación de Confreríes de Pescadores d’Asturies, quien de mano refuga que la causa sía «la sobrepesca», yá que asegura que cada vez son menos les embarcaciones que se dediquen a esta captura.
Amás, José Manuel García, vicepresidente de l’Asociación d’Armadores de la Pesquería del Pulpu con Certificáu de Sostenibilidá (Arpesos), matiza que los pescadores tán cumpliendo rigorosamente «colo que nos imponen», aceptando ensin poner inconvenientes l’amenorgamientu de nases para la so captura.
Dambos profesionales espliquen qu’en temporaes anteriores yá veníen percibiendo unu amenorgamientu de les captures y que les campañes diben siendo peores. «Pensábamos que podía ser un ciclu: lo habitual ye que podía haber una campaña mala y dempués otres dos o trés bones, pero llevamos unos años que se nota que la captura de pulpu va a menos», manifiesta José Manuel García, que repostia que la pasada más qu’una mala campaña «foi una campaña ruinosa». En palabres del presidente de la Federación de Confreríes de Pescadores d’Asturies foi «la peor costera del pulpu que se recuerda y que ta documentá de la hestoria» a pesar de que se sigue prindando col mesmu arte, de la baxada de nases y de que «cada vez menos embarcaciones dedíquense a esta campaña».
Ye por ello qu’Adolfo García refuga que la razón de la escasez del cefalópodu na mariña asturiana sía «la sobrepesca». «Nun sabemos la razón, pero daqué pasa col pulpu porque nun hai pulpu», llamenta’l mesmu, que magar considera que pueda ser por daqué medioambiental, refuga la idea de que pueda ser pol aumentu de la temperatura de l’agua basándose en que n’otres zones d’España nes que l’agua inda ta dos o trés graos más caliente qu’equí, como pue ser la zona de Conil de la Frontera, en Cádiz, «sí hai pulpu, polo que’l calentamientu de l’agua nun ye la causa de la desapaición del pulpu», considera’l representante de les confreríes de pescadores de la rexón.
Una razón de la estrema escasez del cefalópodu na mariña cantábrica asturiana podría ser tamién la escasez tamién del cámbaru patelo o cámbaru nadador, apunta’l vicepresidente d’Arpesos, un cámbaru del que s’alimenta’l pulpu y qu’antes solía ser abondosu nes sableres del fondu del mar. «Ello ye que ye un cámbaru que s’utiliza enforma pa pescar llubines y nel occidente nun hai nada, polo que los pescadores tiénense que mover a sitios como Galicia pa consiguilo», añede José Manuel García, que confía en que la próxima campaña sía meyor «porque dalgún tase viendo». «Anguaño tánse señalando pulpos per delles zones, pero l’añu pasáu nun se señalaba nengún», tresllada’l mesmu. Amás, tien en cuenta que «en Galicia, na parte del Atlánticu, pescóse abondo bien», polo que caltien la esperanza de que los pulpos qu’agora apaecen nes redes y que se suelten antes de xubiles a los barcos anuncien una meyor campaña que la pasada.
El pulpu, un productu de luxu
Ante la escasez d’esti mariscu tan apreciáu y valoráu na cocida, Adolfo García comenta que «el pulpu podemos dicir que se volvió gourmet», y xustificase en que si va unos años pagábase’l quilu na rula a 6 o 7 euros, más apocayá llegó a pagase a 14 o 15 euros. «El pulpu d’equí convirtióse nun productu de luxu, porque algamó un preciu que nunca pensamos qu’algamaría», indica’l presidente de la Federación de Confreríes de Pescadores d’Asturies, qu’amiesta que «Asturies y Galicia, colo que producen, nun abastecen la demanda de los mercaos, polo que’l pulpu tien que venir de fora».
Pero’l perxuiciu nun ye namá pa los mercaos y pal veceru que demanda’l pulpu. García alvierte que la escasez del cefalópodu «afecta negativamente al sector pesqueru» entrín y non la del pulpu ye «una costera piquera pa quien trabayaben seis meses de continuu al pulpu. Al nun dir al pulpu, pos van a otres pesqueríes, lo qu’implica que s’esploten más otres especies», esplica Adolfo García, que precisa qu’el 60% o 70% de la facturación de munchos barcos dependen del pulpu. Otra afección económica negativa que señala ye pa les rules, a les que tamién-yos repercute nuna baxa facturación cola que tienen que caltener los mesmos emplegaos.
Por estes razones, el representante del colectivu de confreríes de pescadores d’Asturies sentencia que la escasez de pulpu na mariña asturiana «ye la ruina» pa una parte importante del sector pesqueru. Ye por ello que diz que si en próxima campaña sigue ensin haber bones captures va faese necesariu que l’alministración pública tome midíes y realice estudios que determinen el porqué de la desapaición del pulpu de les mariñes asturianes, amás de que sían necesaries ayudes económiques pal sector si s’imponen nueves vedes pa la so pesca.
