«Hai un movimientu increíble agora mesmo, con proyectos de munchísima calidá y mocedá faciendo coses perinteresantes» Ana Feito, Alba Suárez y Alba Estrada formen Rellume, unu de los grupos que van tocar nel IV Semando Fest. Musicasturiana.com
Rellume, el tríu de pandereteres moces, ye una de les bandes que nuna semana va xubir al escenariu de la Lata de Zinc d’Uviéu, dientro de la cuarta edición del Semando Fest.
Magar de la so mocedá, el grupu yá compartió escenariu con Süne y Catuxa Salom nel festival Artístiques, con Herbamora en La Pola Siero y fueron unu de los grupos que tocaron na última edición del Cachu Fest. Con elles falamos del presente y futuru de la música tradicional.
Pa quien entá nun vos conoz, ¿cómo presentaríais a Rellume en poques pallabres?
Diríemos que Rellume ye un grupu formáu por tres muyeres xóvenes que con esti proyectu musical busquen tresmitir la so pasión y espresión propia, de la música tradicional enfotada a montar filera pal baille.
¿Recordáis el momentu nel que pensásteis: “esti proyectu tien que salir alantre xuntes”?
¡De xuru! Ye un recuerdu grabáu a fueu, siempres lu cuntamos. Foi nel FolkAyer del 2024, onde surdió la idea. Esa nueche echamos un baille tres d’otru y cuando paramos a cenar dalgo, Alba Suárez saltó con: “Ai, qué guapo sedría montar un grupín pa cantar y que la xente baille y lo esfrute tanto como nosotres”, comentariu al que nun fizo falta da-y más vuelta. Ensin pensalo muncho más, propunxímonos seriamente l’entamar a xuntanos y pues equí tamos.
«Rellume como colectivu ye esa chispa que la música tradi nos fai sentir y que queremos proyectar»
El nome Rellume suxere lluz, destellu… ¿qué significa pa vosotres?
Cuando tábemos en búsqueda del nome que diba representar el conxuntu que formamos les tres, queríemos una pallabra que reflexara la enerxía que se xenera nel baille y na percusión. Al final, Rellume como colectivu ye eso, esa chispa que la música tradi nos fai sentir y que queremos proyectar. Ye, de dalguna manera, volver a da-y lluz y saca-y provechu a cantares y bailles d’antaño pa caltenelos con nós anguaño.
¿Cómo ye’l vuestru procesu pa llevar la tradición al escenariu ensin que pierda’l so raigañu?
La base ye’l respetu fonderu polo que facemos, y polos y poles que nos lo enseñaron y enseñen. Escuchamos munchu archivu, pero nun buscamos copiar y pegar tal cual como se documentara. La clave ta en caltener los
ritmos y l’espíritu del baille, pero dexando que la nuesa personalidá y les nueses voces fluyan con naturalidá en base a esto.
«Nun va ser un conciertu pa quedase mirando; apostamos por una propuesta que faiga al públicu participar, cantar y sobre manera, gastar suela baillando»
¿Qué llugar ocupa la pandereta na vuesa vida musical y personal?
Ye muncho más qu’un simple instrumentu. La pandereta ye la nuesa forma de conectar cola nuesa tierra, col pasáu y cola xente que tenemos delantre. Ye una ferramienta d’empoderamientu que nos dexa espresanos cantando.
Vais actuar nel Semando Fest. ¿Qué pue esperar el públicu del conciertu de Rellume?
¡Muncha enerxía y ganes de pasalo perbién! Nun va ser un conciertu pa quedase mirando; apostamos por una propuesta que faiga al públicu participar, cantar y sobre manera, gastar suela baillando. Vamos facer un percorríu per ritmos variaos del país, pero siempre col envís de que la folixa nun pare.
«Que se dean espacios a la mocedá pa facer cultura propia ye lo que garantiza que la música siga viva y non estancada. Sentímonos mui agradecíes y responsables»
¿Qué tien d’especial tocar nun festival que sofita la cultura y, especialmente, la cultura fecha por xente mozo?
Ye daqué fundamental. Que se dean espacios a la mocedá pa facer cultura propia ye lo que garantiza que la música siga viva y non estancada. Sentímonos mui agradecíes y responsables. Tocar nel Semando ye dalgo
mui especial, l’añu pasáu tábemos como espectadores y qu’agora vayamos xubir al escenariu, ye una pasada. Proyectos como’l Semando dexen que les nueves xeneraciones se den a conecer y animen a otros a llanzase. Al final, ver a xente mozo faciendo esto ye lo que normaliza la nuesa música y fai que la rueda siga xirando.
¿Qué significa pa vosotres formar parte del momentu actual de la música tradicional asturiana?
Sentímonos mui afortunaes. Hai un movimientu increíble agora mesmo, con proyectos de munchísima calidá y mocedá faciendo coses perinteresantes. Tar ehí metíes, aportando’l nuesu granín de sable, xunto a tantos
compañeros y compañeres talentoses, como son los grupazos colos que compartimos cartelu, da munchu aliendu pa siguir. Sentimos qu’hai una comunidá mui fuerte emburriando p’alantre.
Pa quien tea dudando en dir a la vuestra actuación, ¿por qué nun tendría que perdelo?
Porque l’ambiente va ser d’esos que presten. Un espaciu vivu, con xente allegre y con muncha gana de folixa. Vamos crear un ambiente ente toos y toes nel que se pueda desconectar, vivir el momentu y sobre too, esfrutar de lo que nos une a les que taremos ellí, la pasión pola música de raigañu y l’arguyu de pertenencia a esti país y a la so cultura.
