La cangueta Belinda Álvarez tien nuevu llibru, ‘Las aventuras de Abel’. Cuentos curtios acompañaos de cantares pa neños d’hasta ocho años. LNE / TPA
‘Las aventuras de Abel’ ye’l nuevu llibru de la escritora y violinista Belinda Álvarez. La cangueta vuelve xunir les sos dos facetes nesti llibru infantil. Una obra compuesta por 10 cuentos curtios, pensada pa neños d’ente cuatro y ocho años. Hestories cencielles y cotidianes, nes que se trabayen valores como l’autoestima, la empatía o les emociones, con situaciones reconocibles pa los más neños.
Cada cuentu complétase con una añada compuesta pola mesma autora, una forma de xunir lliteratura y música y d’acompañar esi momentu previu al descansu. Un pequeñu adelantu de cómo suenen pudo esfrutase na presentación oficial del llibru nel teatru Toreno. Belinda pon voz y música al violín a caun d’ellos.
‘Las aventuras de Abel’ ye’l cuartu llibru de la cangueta, tres la triloxía ‘La lleenda de los Xilem’, más enfocada al públicu xuvenil.
La violinista canguesa, Belinda Álvarez, sigui escribiendo y desenvolviendo esa faceta d’escritora de lliteratura infantil qu’espertó nella cola llegada de la maternidá y la pandemia. Publicó’l so últimu llibru de la triloxía “La lleenda de los Xilem” l’añu pasáu, dirixida a un públicu infantil y xuvenil, y anguaño llega con una propuesta distinta, un llibru de diez relatos, enfocáu a edaes d’ente cuatro y nueve años.
“Ye un llibru más cortín, de diez hestories, pensaes pa ser lleíes al neñu xustu antes de dormir, amás cada hestoria va con una añada a la fin del cuentu”, detalla l’artista. De nuevu, les sos vivencies como madre son les que lu inspiraron pa crear el so nuevu llibru: “Les aventures d’Abel”.
Cunta que la idea surdió-y d’una forma bien personal, porque’l mio fíu ta encegoláu colos suaños y cuando tien unu quier que lo apunte”. Y anque nun son los suaños del pequeñu de la casa los que se reflexen nel llibru, sí se basa nesa fascinación poles hestories que tien el so fíu y que lu acompañen mientres duerme.
“Les hestories que recueye’l llibru son bien sencielles, bien cotidianes y que tienen valores como’l de les emociones, autoconfianza, fantasía, sensibilidá Toes tienen una moraleja”, esplica l’autora. Añede amás que “a la fin son hestories que tán inspiraes nel día ente día col mio fíu”.
Como yá fixera nos llibros de la so triloxía, la so faceta musical afigurase nes sos creaciones lliteraries. Nesti casu, caúna de les 10 hestories va acompañada con una añada compuesta ya interpretada por ella. Son cantares con lletra na que se recueye la hestoria de cada relatu y a les que puede aportase a partir d’un códigu QR que s’atopa a la fin de cada unu de los cuentos.
