Cultura caltién l’apoyu a Fontes d’Iviernu con una propuesta pa reforciar el so interés deportivu y turísticu tol añu. ActualidáEl proyectu quier doblar el númberu de quilómetros de pistes d’esquí, al pasar de los 8,7 actuales a 16, asina como instalar cinco telesquíes nuevos.
- El documentu detalla actuaciones pa garantizar la viabilidá del complexu nel contestu de cambéu climáticu y potenciar la so conexón futura con San Isidro
La conseyera de Cultura, Política Llingüística y Deporte, Vanessa Gutiérrez, presentó güei al alcalde d’Ayer, Juan Carlos Iglesias, un proyectu pa reforciar el potencial deportivu y turísticu de la estación de monte de Fontes d’Iviernu a lo llargo de tol añu, y non solo na temporada de nieve. Ente otres iniciatives, el Gobiernu de Asturies quier doblar el númberu de quilómetros de les pistes d’esquí: pasaríen de los 8,7 actuales a 16.
La propuesta d’aprovechamientu integral y sostenible del dominiu esquiable de Fontes d’Iviernu, que va sometese nos díes próximos a información pública y ta pendiente de la so tramitación ambiental, enmárcase na estratexa autonómica pa consolidar les estaciones de monte como un referente turísticu y deportivu tol añu. L’oxetivu ye reforciar la competitividá de Fontes, incrementar la calidá del serviciu y asegurar la so viabilidá nel contestu de cambéu climáticu, amás d’atender les demandes nueves del sector.
Con esta mira, la propuesta, tovía nuna fase inicial, incluye delles acciones posibles. Por exemplu, una tresformación integral que, ensin aumentar el dominiu esquiable actual, va dexar cuntar con 16 quilómetros de pistes, balizaos y acondicionaos. Esta midida, amás d’incrementar la ufierta, amenorgaría los riesgos asociaos al esquí fuera de pista. Amás, prevé la posibilidá d’instalar cinco telesquíes nuevos, que diben desconxestionar les árees pa debutantes y facilitar la movilidá na estación, incluyida la conexón futura con San Isidro.
Otru aspectu clave ye la meyora medioambiental. El proyectu prevé la restauración integral de la redolada con revexetación y midíes correctores que van garantizar la sostenibilidá y la integración paisaxística. De la mesma, contempla la posibilidá d’habilitar una balsa y instalar cañones de nieve artificial, esenciales p’asegurar l’apertura en temporaes con precipitaciones escases y enllargar la duración de la nieve nes pistes.
Tocante a los servicios, la propuesta respuende a demandes históriques de les persones usuaries, como la posibilidá de construyir un edificiu que valga de cafetería y aseos na base intermedia, lo qu’evitaría desplazamientos innecesarios hasta la zona baxa. Tamién proyecta la posibilidá de crear un hangar y talleres na base de la estación pal caltenimientu de maquinaria y remontes, lo que va contribuyir a amenorgar la buelga de carbonu de les máquines citaes. Amás, incluye la posibilidá d’ampliar l’edificiu d’usos múltiples cola mira d’ameyorar la escuela d’esquí, les oficines y l’espaciu destináu al arriendu de material.
La iniciativa de la conseyería tamién apuesta por desestacionalizar el complexu deportivu y dexar la so apertura fuera de el periodu d’iviernu p’actividaes recreatives como senderismu, ciclismu o pruebes deportives. Esta midida va contribuyir a dinamizar el turismu nel conceyu d’Ayer y en tol valle nel restu del añu, al traviés de la xeneración d’oportunidaes económiques y sociales nueves.
Cola so propuesta, el Principáu avanza nel so compromisu con un modelu de xestión sostenible que combina la protección del mediu ambiente col desenvolvimientu económicu y social. Fontes d’Iviernu consolídase asina como un recursu estratéxicu pal turismu activu y la práctica deportiva n’Asturies, con una visión de futuru que garantiza la so competitividá y encantu.
Alcuerdu cola Diputación de Llión
Dientro de la meyora medioambiental de la estación inclúyese tamién l’alcuerdu firmáu ente’l Gobiernu d’Asturies y la Diputación de Llión, una collaboración que va garantizar el suministru eléctricu necesariu pa modernizar la estación. Esti alcuerdu dexa aprovechar la infraestructura existente en San Isidro y asegurar el serviciu completu al complexu ayerán. La estación va ganar n’eficiencia enerxética y competitividá.
La cooperación ente Asturies y Llión abre la puerta a la integración de dambos dominios esquiables, cola mira de crear un gran espaciu deportivu. La electrificación ye, por eso, el primer finxu d’una estratexa común qu’apuesta pola sostenibilidá, la innovación y el desenvolvimientu conxuntu de les estaciones de monte.
