Belén Arboleya (Lieres, 1972) ye dende’l pasáu 27 de febreru la presidenta de l’Asociación Intérpretes Canción Asturiana – AICA 
Ella tien al costazu toa una vida dedicada a la música’l país como bailladora, gaitera y cantadora, a la qu’agora suma una estaya más: la de dinamizar la escena de la canción asturiana a traviés de l’asociación que preside. Falamos con ella p’afondar nesti llabor nuevu. Músicasturiana.com
Belén Arboleya (Lieres, 1972) ye dende’l pasáu 27 de febreru la presidenta d’AICA (Asociación d’Intérpretes de Canción Asturiana). Arboleya lleva tola vida venceyada a la tradición musical asturiana: entamó a baillar con namás siete años y con nueve deprendió a tocar la gaita xunto a Luis de Arnizo, faciendo’l so perfeccionamientu nel instrumentu col “Gaiteru de Veriña”. En 1983 entró a formar parte del Grupu Folklóricu y d’Investigación El Ventolín de La Pola Siero y más tarde entamó a acompañar a la gaita a los más grandes intérpretes de la canción asturiana. Esti llabor d’acompañamientu a la voz convirtióla en gaitera oficial de dellos concursos d’asturianada de tol país. Amás, tamién tien tocao pa la misa de gaita, qu’agora interpreta siendo ella tamién vocalista.
En 2012 entamó a participar en concursos como cantadora, algamando dellos premios y clasificaciones en varios d’estos certámenes. Na actualidá, ye mayestra de baille tradicional en Suarías (Panes). A la fin, Belén Arboleya tien al costazu toa una vida dedicada a la música’l país dende distintes estayes a la qu’agora suma más: la de dinamizar la escena de la canción asturiana a traviés de l’asociación que preside y na que l’acompañen na Xunta Directiva Oscarín Fernández (gaiteru), Jorge Areces (gaiteru y mayestru), Iván Rionda (Gaiteru), Noemí Torrado (cantadora), María José García (cantadora), Cristina Sánchez (cantadora), José Manuel «El Maestru» (monologuista), Iván Tomás (gaiteru), Fermín García (tamboriteru), Manuel Roza Llera (cantador), y Luz María del Sol (monologuista). Falamos con ella p’afondar nesti llabor nuevu.
Pa quien entá nun conoz a la vuestra asociación, ¿qué ye AICA y qué función desendolca?
L’Asociación de Intérpretes de la Canción Asturiana, ye una asociación ensin ánimu de llucru, fundada en 1990 cola ilusión d’esparder y caltener la canción asturiana en toles sos facetes, nun momentu críticu nel que nun tenía’l respetu que se merez la nuestra canción más ancestral. Daquella yera cuando podíes lleer nos chigres lo de “Prohibío cantar”. Amás, AICA cunta tamién con gaiteros, grupos de teatru costumistes, monologuistes, tamboriteros, col fin d’ufrir muestres y actos venceyaos a la cultura asturiana.
Yes presidenta d’esta asociación dende’l 27 de febreru, ¿qué supón pa ti?
Énte l’anunciu d’elecciones, un grupu de xente venceyada dende neños a les tradiciones y a la tonada xuntámonos pa facer un equipu qu’asegurara la continuidá d’AICA. Dalgunos son fíos de fundadores y socios dende rapacinos. Pa mí supón agradecimientu, señaldá y almiración pola xente que nos la traxo hasta estes feches con trabayu; ye lo que fai qu’agora coyamos el relevu pa llevala unos añinos más allá y los nuestros neños la garren el día de mañana. Asina ye que’l pasáu 27 de febreru, apostaron por nós como Xunta Directiva y l’equipu punxo la confianza en mí pa presidila.
«AICA nació1990 cola ilusión d’esparder y caltener la canción asturiana en toles sos facetes, nun momentu críticu nel que nun tenía’l respetu que se merez la nuestra canción más ancestral. Daquella yera cuando podíes lleer nos chigres lo de ‘Prohibío cantar’»
Agora qu’asumes la Presidencia. ¿Qué novedaes va a tener la tu gestión?
Lo que nos axunta a toos y toes, ye que’l futuru pasa pola xente mozo y eso nun significa abandonar lo qu’hasta agora se vino faciendo, que ye un llabor importantísmo’l que fizo AICA en tou esti tiempu. Pero tamién ye verdá que’l contestu social d’agora ye mui distintu. Lo que pensamos nun ye qué podemos aportar pa poder averar la canción asturiana una migayina más a la xente mozo; sinón qué ye lo que lo aisla d’ella. Siempre va a haber neños que dende que nacen tengan esa inquietú y asimilen el contestu de la canción asturiana con naturalidá, pero esos son los menos. Creemos qu’a quien hai que llegar ye a munchos rapacinos y xente mozo que, ensin tener esa inquietú, tengan la posibilidá de descubrila.
Sabemos que ye un llabor complicáu; la teoría ye mui clara, pero da-y forma ye otra cosa. Toos tamos d’alcuerdu en que debemos trabayar na xera educativa: la difusión a traviés de talleres y conciertos didácticos, alcuentros d’escueles y n’escueles, talleres específicos, eventos estremaos, les redes sociales… nun vamos descubrir nada nuevo, pero sí creemos que contestualizando, en dalgunos casos, la tonada n’ambientes sociales diversos, podemos llegar a más xente. Siempre respetando los raigaños y la pureza que nos tresmitieron, sinón, perdería la so esencia, yá nun sería tonada.
¿Qué valoración faes del trabayu desendolcáu por AICA hasta la fecha?
Tamos falando d’una asociación qu’entamó de la nada, nun momentu críticu pa la canción asturiana y que ye, agora mesmu, un pegoyu de la cultura asturiana mui importante gracies al caltenimientu, dignificación, relevu xeneracional y espardimientu de la nuestra música per tol territoriu astur toos estos años.
«Toos tamos d’alcuerdu en que debemos trabayar na xera educativa: la difusión a traviés de talleres y conciertos didácticos, alcuentros d’escueles y n’escueles, talleres específicos, eventos estremaos, les redes sociales…»
¿Cómo ves la situación actual de la canción asturiana?
Creo que nun ye mala del too en cuantes a mayestros de tonada, xente que ta deprendiendo, intérpretes y cantadores nun altu nivel; amás los neños que quieren cantar tienen posibilidaes pa dir a escueles. Siempre podría ser meyor, pero hai que pensar que ye una forma de cantar pa la que se necesiten unes facultaes especiales. Casi toos esos neños faenlo porque los sos padres son siguidores de la tonada y los apoyen. Axallá, tuviéramos mucnhos más padres asina.
Lo que más nos esmolez ye la edá media del públicu. Tenemos un públicu que nos sofita al 100%, pero con una media d’edá alta y que vemos amenorgar añu a añu. Necesitamos xente de mediana edá y xoven que s’interese: esi ye’l retu, el despertar esa curiosidá a la xente mozo y animar al públicu de mediana edá qu’al empar la tresmitan a los soss fíos.
«Lo que más nos esmolez ye la edá media del públicu. Tenemos un públicu que nos sofita al 100%, pero con una media d’edá alta y que vemos amenorgar añu a añu»
El domingu 22 de marzu vas dar una charra pol Día Internacional de la Gaita entitulada “Vivencies d’una gaitera asturiana”. ¿Pues avanzanos dalgo de qué va poder sentise en ella?
A mí prestame la cercanía y más siendo una charra pa xente mozo. Falaré un poco de cómo entamé pa romper les formalidaes, de dalguna vivencia que se m’ocurra… pero lo que más me presta ye que la xente m’entrugue lo que quiera, facer una charra entretenía, con dalguna piecina de gaita, gaita y tambor o si quieren canto una tonada y que prueben a acompañámela; ser gaiteru acompañante ye una especialidá más del nuestru instrumentu y hai pocos. Lo meyor ye lo que sursa sobre la marcha, que los neños s’atrevan a cuntame los sos intereses al respecto y s’animen a acompañame o tocar conmigo.
Préstame presumir de tener compartío, cuando yera neña, vivencies con cantantes, gaiteros, monologuistes… que yá nun tán; eso márcate un recuerdu entrañable. Por eso, creo que ye muy prestoso, más que falar yo, que me cunten ellos y nun seya un actu formal.
