Francisco López Delgado, con una ponencia, y Esteban Méndez, Marcos Arenas y Rodrigo Joglar nuna amuesa de gaites van ser los representantes. Musicasturiana.com
La International Bagpipe Conference, eventu bianual entamáu pola International Bagpipe Organisation, va cellebrase esti fin de selmana 6, 7 y 8 de marzu na ciudá belga de Leuven. Esti añu l’eventu va cuntar con participación asturiana, col gaiteru y musicólogu Francisco López Delgado, cola ponencia «Reinventing tradition: the asturian bagpipe in orchestral music», el sábadu 7 a les 17:30 hores.
Amás d’ello, los gaiteros asturianos Esteban Méndez, Marcos Arenas y Rodrigo Joglar van completar la representación del país, nuna amuesa de gaites que va tener llugar mesmu sábadu 7. Rodrigo Joglar quier rescamplar amás que la participación nesti eventu va sirvir como presentación del proyectu del Conceyu de la Gaita (del que ye vicepresidente) a otres asociaciones similares d’ámbitu internacional, tendiendo pontes y texendo redes de collaboración pal futuru. El Conceyu de la gaita va entamar el prosimu22 de marzu’l Día Internacional de la Gaita, colo que la participación nesta conferencia europea sirve a mou d’antesala pa la programación del eventu asturianu.
La International Bagpipe Conference ye un congresu internacional dedicáu al estudiu, promoción y difusión de la gaita y les sos tradiciones musicales. Nesti alcuentru xúntense gaiteros, investigadores, artesanos y amantes de la música tradicional de distintos países pa compartir conocimientos al traviés de conferencies, conciertos, talleres y actuaciones. L’eventu busca poner en valor la diversidá de les gaites del mundu y fomentar el intercambiu cultural ente distintes tradiciones musicales.
