La Banda Sonora de María Latores

Un discu qu’enxamás canses de sentir.

Todas las mujeres que habitan en mí, de Vanesa Martín, poles sos lletres, la so voz… Ye puru sentimientu.

Si tuvieres que formar parte d’otru proyectu musical, ¿cuál sería?

Va unos meses tuvi enriba l’escenariu con Ochobre y foi una esperiencia increíble, repetiría ensin dudalo. Tolo que represente compartir música, seya o non del estilu al que toi acostumbrada, ye más que bienveníu.

«Ye mui frustrante nun vela sofitada por munchos ayuntamientos, nun poder cantar casi en nengún chigre, nun tener más sitios onde mostrala casi que nos concursos, con tolo qu’ello conlleva»

De los cantares que compusisti o interpretes, ¿cuál ye’l to preferíu?

‘Siendo guaje fue a la mina’, dedicáu al mio güelu. El nome ya diz bastante, ye un pequeñu (pequeno, como diría él) homenaxe a dalgo tan nuestru. Hai munchos cantares dedicaos a la minería pero esta ye mía, ye de la mio familia, y fala d’él.

¿Cuándo foi la primer vez que xubisti a un escenariu y que pasó enantes, durante y depués?

Creo que foi nel festival de fin de cursu de la Escuela de música tradicional Martínez Torner, d’Uviéu, na sala de cámara del Auditoriu. Curiosamente, foi nel mesmu sitiu onde yo decidí entamar a cantar tonada, un tiempu enantes. Munchu nerviu (d’esos que nun se quitaron a día de güei) pero con ganes de sentir que podía facelo y que quería ser parte de dalgo tan importante y tan poco valorao delles veces como la tonada. Dempués d’esi día sólo quixi siguir.

¿Qué ye lo más inxusto de ser artista?

Podría dicite mil coses, pero voi quedame, dientro de lo qu’a mi me afecta, que la poca valoración que se da a la música asturiana. Ye mui frustrante nun vela sofitada por munchos ayuntamientos, nun poder cantar casi en nengún chigre, nun tener más sitios onde mostrala casi que nos concursos, con tolo qu’ello conlleva… un xuráu, un públicu cada vez menos abondante, y sentir que pa que te vean tienes que tar ehí, compitiendo, y non compartiendo…

«Hai munches coses que deprender y que sedría maraviyoso que valoraran, a la vera de la diversidá de repertoriu o de lo guapo que lo faes, o “por quién cantes”»

Si fueres Conseyeru de Cultura, ¿qué son les primeres coses que fadríes?

Entamar más muestres de folclore (non sólo tonada), onde la xente esfrute de lo que realmente ye Asturies, sofitar les escueles con recursos, y quizá taba guapo formar a les y los artistes más allá del repertoriu. Hestoria, composición, estilos… hai munches coses que deprender y que sedría maraviyoso que valoraran, a la vera de la diversidá de repertoriu o de lo guapo que lo faes, o “por quién cantes”, que tamién ye importante, obviamente, pero la tradición va más allá d’eso, y si nun cambiamos les coses pronto nun va quedar qué defender…

Enantes de ser artista de la música asturiana, de xuru que sentisti o visti en directo a más compañeros y compañeres d’esta escena. ¿Quién te marcó y t’animó a xubir al barcu de facer música n’asturianu?

Puedo dicite que’l mio entamu tuvo provocáu por Manuel López Menéndez (Corujo), al que vi cantar nel mesmu festival qu’enantes comentaba de la Escuela de Música tradicional d’Uviéu, y que namás velo plantáu nel escenariu recordóme al mio güelu Mador… y nesi momentu dixi-y a mio ma que quería entamar yo tamién a cantar tonada… Amás de Manuel, viera a Anabel Santiago, que tiempu depués sería la mio mayestra y de la que deprendí prácticamente tolo que sé de canción asturiana. Ye innegable que la so fuercia nel escenariu y la so renovación mostróme tamién que se pueden facer munches más coses (bien prestoses y averaes a la música actual) cola tonada tradicional.

Mariluz Cristóbal Caunedo tamién ye un referente claru y una mano a la qu’agarrase, cola que tamién compartí escenariu nel nuestru pasu pol Colectivu Muyeres y a la que quiero especialmente.

«Soi arguyosamente vieya y xoven a la par no qu’a música se refier. Lo mesmo siento cantar a Rocío Dúrcal (faciendo-y los coros, ¡obviamente!) que siento temes de rap de Natos y Waor, Sharif o Zpu coles sos lletres revolucionaries»

Yá conocemos les tos recomendaciones y influencies… agora toca que te confieses: ¿cuál ye esi cantar o esi grupu qu’escuches culposamente “na intimidá”?

¡Culposamente nengún! Soi arguyosamente vieya y xoven a la par no qu’a música se refier. Lo mesmo siento cantar a Rocío Dúrcal (faciendo-y los coros, ¡obviamente!) que siento temes de rap de Natos y Waor, Sharif o Zpu coles sos lletres revolucionaries (por ponete dos exemplos vien separaos l’ún del otru). Nun me pongo cortapises nin llímites, aunque sí puedo dicir que prefiero les lletres en castellán.

¿A qué personaxe públicu convidaríes a un conciertu tuyu, a pasar llueu pel backstage y pa qué?

Ensin dudes, a Rozalén. Admírola dende aquel “80 veces” que m’enseñara mio pá depués de descubrila na radio y decime “hija, escucha a esta moza, va prestate”, y asina foi. Dende esi día les sos lletres son refuxu, y pa mi ye una de les meyores compositores del momentu. Amás, tuvi la ocasión de falar con ella depués d’un par de conciertos y nun puede ser más cercana. Vela nun conciertu míu sedría un suañu, y nel backstage taríamos, de xuru, cantando mientres hores. 😊

Yá qu’escoyisti la to “Banda Sonora Vital”, vamos rematar con una Banda Sonora Orixinal. ¿De qué llibru n’asturianu te prestaría qu’hubiere una película a la qu’amás pongas-y tú la BSO?

Prestaríame abondo que fixeren obres cinematográfiques de los llibros d’Aitana Castaño. Minería y hestoria d’Asturies n’estáu puru.

Asina fala María Latores de los cantares qu’escoyó pa la so playlist

• Zpu – Imagina. Siéntome mui identificada con ella, el querer ser poeta, el sentir que nun encaxes…
• Rozalén – El día que yo me muera. Cante-yla a mio güela nel día que nos dexó…
• Rocío Dúrcal y Joaquín Sabina – Y nos dieron la diez– Clásicu interpretáu por dos mayestros indiscutibles.
• Mägo de Oz – Hasta que el cuerpo aguante. Tengo’l títulu tatuáu na espalda, porque nun pienso dexar de cantar mientres tenga voz.
• María Ruiz – Primavera nuestra. Reivindicación feminista n’estáu puru.
• Backstreet Boys – I want it that way. La banda sonora de la mio adolescencia, incluyida nun discu que’l mio hermanu me traxo de Canadá enantes de que saliera a la venta equí n’España)
• Ella baila sola – Por ti. Pa mi, la canción d’amor más prestosa enxamás escrita, qu’amás marcó tamién la mio adolescencia.
• Sharif – Dorian Gray. Siéntome mui identificada con esta lletra, dende la primer frase.
• Extremoduro – Dulce introducción al caos. Hai pocos temes que seyan más importantes qu’esti pa tolos que en dalgún momentu sintimos la falta d’inspiración, con un puntu de rebeldía clave nel repertoriu del gran Robe Iniesta.
• Tejedor – Andolina. Ún de los primeros temes de música folk qu’escuchara allá pel añu 2003, y que más me sintieron cantar mios pas per casa.
• Victor Manuel – La romería. Siempre qu’escucho esti cantar cántola como si me fuera la vida nello.
• Muyeres – Pinky. Lletra mía con arreglos de Marta Elola, un cantar col que finaben los espectáculos d’Humanes y que siempre ponía en pie al públicu.
• Corquiéu – La Molinera. Cantares que falen d’amores reprimíos qu’enxamas debieron escondese.
• Felpeyu – Nun quiero coyer la flor. Clásicu inmortal. Siempre me presten especialmente los cantares que falen del amor d’una forma tan gráfica y con tanta guapura,
• Mariluz Cristobal Caunedo – Vaqueires. Cantar que llevé a dellos concursos nos qu’incluyíen modalidá de canción vaqueira y que nun puedo cantar con más arguyu.
• Los Berrones – Calcar na tená. Un tema clásicu que tamién ye pa cantar al altu la lleva.
• Nuberu – Tengo de rondar to valle. Esti tema puede sonar na mio llista de Spotify ente otros actuales y enxamás lu paso. Ye una melodía bien prestosa con una lletra picarona que nun pasa de moda.
• Anabel Santiago – A la madre del mineru. Nun hai vegada que nun me respigue al sentir esti cantar, que Diamantina Rodríguez tan bien representaba y qu’Anabel recueye nel so discu homenaxe a esta artista, clave na canción asturiana con voz de muyer.
• Marisa Valle Roso – Romance de la neña Isabel. Munches hores eché yo escuchando esti romance tan bien interpretáu por Marisa nel so discu Consciente del que soi arguyosa mecenes.
• Xentiquina – El coche’l maestru. Tema prestosu pa sentir nes aules, o pa glayar nel coche.