Naz Cuévano, un grupu con raigañu y voz propia. La banda de creación recién fórmenla 12 artistes qu’entemecen la mocedá cola esperiencia. Musicasturiana.com
La escena de la música asturiana suma dende agora un nuevu nome: Cuévano, un grupu que naz dende’l respetu pola tradición y la voluntá de dar una voz viva y actual al patrimoniu musical del país. La so propuesta bebe de les melodíes y ritmos de siempre, venceyaos a la tierra y a la memoria colectiva, integrando instrumentos tradicionales nuna mirada abierta al presente.
El grupu xurde de manera natural, al calor de la pallabra compartida y la música, nes xuntances habituales que se daben na taberna polesa col mesmu nome, un chigre que dende hai tiempu funcionaba como espaciu d’alcuentru pa xente diverso venceyada pola cultura asturiana. D’esi ambiente salieron les primeres idees, los primeros cantares y la necesidá de llevar esi espíritu más allá d’aquel llugar.
El colectivu integra a músicos y voces de gran trayectoria y relevu xeneracional: Xuacu Amieva, mayestru gaiteru; José Alfredo Cordero, voz curtida nel tiempu y saxofonista; Dani Álvarez, multiinstrumentista y referente del folk asturianu; Simón San José, luthier y percusionista; Carlos “Carlinos” Velasco, voz masculina potente; Alicia Villanueva, voz femenina escepcional; Chino el Indio, guitarrista rockeru; Julio Rodríguez, bouzukista y vigulinista xoven; Alex “Petu”, baxista y produtor musical; Leti Cienfuegos, corista y creadora audiovisual; Alba Cuadra, corista y responsable del merchandising; ya Iván Testón, coordinador del grupu y xestor de tola loxística.
Pel momentu, la banda de creación recién tien yá na so axenda dos conciertos programaos. D’una banda, el 22 d’abril na taberna de La Pola Siero que dio nome al grupu y, d’otra banda, nel mes de mayu en Pendones (Casu) nun eventu entá por anunciar.
