El pasu d’una umbada al norte de la Península Ibérica va protagonizar, ensin dala dulda, la previsión meteorolóxica tantu para’l miércoles como para la primer metá del xueves. En cuanto al estáu de los cielos, mientres gran parte del día esperamos más nubosidá escontra l’occidente y escontra el cordal onde nun se refuguen bastios a lo llargo del día. Nel restu, los cielos van tar más llimpios de nubes de primeres, pero conforme vaigan trescurriendo les hores, les nubes van dir aumentando hasta estendese prácticamente por tola rexón na recta final del día. Ello ye que les precipitaciones dirán xeneralizándose mientres les últimes hores y, con muncha más seguridá, na madrugada del miércoles al xueves. Pero lo más destacao van ser los fuertes vientos que s’esperen de suroeste-oeste. A partir de les 20:00 hores de la tarde se va activar l’avisu mariellu en tol Principáu salvu na mariña por raches que podríen algamar los 90 km/h. Esti avisu va concluyir a les 10:00 hores del xueves. Na mariña l’avisu va empecipiar a medianueche concluyendo a mediudía na mariña occidental, y a les 16:00 hores de la tarde na mariña oriental. Tamién, a partir de medianueche, va activase l’avisu naranxa na mar por foles d’hasta 6 metros d’altor, que va pasar a mariellu de mediudía del xueves con foles d’hasta 5 metros.
