Salú convoca ayudes para entidaes locales por valor de 1,2 millones para programes de promoción del bienestar. El presupuestu d’esta llínea de subvenciones aumenta en cien mil euros respecto al añu pasáu.
La Conseyería de Salú publicó güei nel Boletín Oficial del Principáu (Bopa) la convocatoria d’ayudes a entidaes locales para’l desenvolvimientu de planes y programes de promoción de la salú y el bienestar de la ciudadanía. Esta llínea de subvenciones, destinada a conceyos y mancomunidaes, cuenta anguaño con una dotación de 1.200.000 euros, cien mil más que l’añu pasáu. Los detalles de la convocatoria pueden consultase nel siguiente enllaz del Bopa: https://goo.su/jMFzF
Les ayudes van concedese en réxime de concurrencia competitiva para impulsar iniciatives que fomenten el bienestar ente la población y xeneren redolaes saludables. Asina, van tenese en cuenta les acciones empobinaes a ampliar habilidaes y capacidaes y a modificar les condiciones sociales, ambientales, económiques, llaborales, xeográfiques, culturales y educatives que tienen impactu na salú.
Con esta midida, el Gobiernu d’Asturies refuerza’l so sofitu económicu a iniciatives locales empobinaes a fomentar vezos saludables y ameyorar la calidá de vida de la población. Estos programes llogren resultaos bien positivos, de la que contribúin a xenerar empleos n’organizaciones non gubernamentales, asociaciones ensin ánimu d’arriquecimientu y empreses del tercer sector.
Les entidaes locales van tener un mes de plazu, a partir de mañana, pa presentar la so solicitú de manera telemática na see electrónica (https://sede.asturias.es).
