¿Cuál ye l’orixe de los nomes de los 78 conceyos asturianos? Unu de los mayores espertos en toponimia da les claves. L’actualizada edición del diccionariu toponímicu de Xulio Concepción recueye 44.000 términos, incorpora nueves llínees d’investigación y moderniza conceutos en percorriendo la rexón y falar colos sos paisanos. LNE
Fai miles d’años los homes y muyeres que vivíen nel territoriu qu’acabaría siendo’l Principáu d’Asturies fueron nomando los llugares que percorríen nel so rudimentariu idioma . Sitios onde cazaben, pescaben, realizaben pintures máxiques nes cueves y torques asturianes, percorríen montes y enllanaes nes sos incursiones para alimentase. Toes esos allugamientos que diben percorriendo precisaben una denominación.
El cronista oficial de L.lena, Xulio Concepción, ye unu de los mayores espertos nel paisaxe toponímico d’Asturies. Lleva décades investigando por pueblos, villes, caminos, riberes, brañes y puertos pesqueros en busca d’esos nomes, de los llugares qu’habitaron los asturianos dende va sieglos. Autor de trés diccionarios toponímicos, anguaño prepara una nueva edición actualizada a puntu d’espublizar que recueye 44.000 topónimos. Dende 2001 en que s’espubliza el primeru hasta l’actualidá pasó de trelce mil a los más de cuarenta mil d’estos nomes propios de llugares de la próxima publicación.
Por cuenta de l’asamblea añal de los cronistes asturianos que se celebró en Quirós apocayá desveló al públicu asistente l’orixe toponímicu de tolos conceyos asturianos na charra «Etimoloxía de los nomes de los 78 conceyos asturianos». Va décades, los llingüistes asturianos Martín Sevilla y Xosé Lluis García Arias, ente otros, empecipiaron l’estudiu toponímicu. Sicasí, el trabayu de Xulio Concepción moderniza los conceutos, incorpora nueves llínees d’investigación nuna tema bien abierta. El cronista l.lenizu investiga sobro’l terrén, fala colos paisanos, analiza la xeografía circundante y otru tipu de factores que puedan influyir nesi nome.
Concepción, doctor en Filoloxía pola Universidá d’Uviéu, esplica qu’esisten delles interpretaciones sobro casi tolos oríxenes, nel casu d’Uviéu hai unes dolce y lo mesmo asocede con Xixón. Los estudiosos nun se ponen d’alcuerdu nos raigaños onde naz una denominación d’otros conceyos con orixe más inciertu como Boal o Yernes y Tameza.
Na so charra na capital quirosana foi esbillando les etimoloxíes posibles, les clasificaciones temátiques y les cronoloxíes toponímiques averaes. Partió dende un puntu de vista históricu venceyáu a la creación de los conceyos asturianos qu’empiecen a crease a partir del sieglu XIII hasta’l XIX. Munchos de los nomes coinciden cola denominación de la capital, 41 de los 78 conceyos actuales. Les grandes ciudaes de la rexón siguen esi patrón, al igual qu’otros conceyos como Balmonte, Pravia, Mieres, ente otres.
La busca de los raigaños etimolóxicos nun dependen d’una sola caña, impliquen la llingüística, la xeografía; coles mesmes inflúin los factores didácticos, divulgativos y cronolóxicos. N’ocasiones hai que remontase a oríxenes preindoeuropeos, indoeuropeos, celtes, llatinos, medievales ya inclusive de dómines más actuales. Esti entrevesgáu «nuedu gordianu» lleva a que se dean delles interpretaciones de cada topónimu.
L’espertu l.lenizu parte de la palabra conceyu que significa xunta de los pobladores. En munchos pueblos esiste esti nome como la corrolada concecho (Ricao, Quirós). El raigañu indoeuropéu «kal-yo» ye llamar, axuntar, si se parte del llatín concilium como xunta, asamblea tenemos dos principios cronolóxicos. El conceyo o esquisa (en dellos conceyos) ye una xunta vecinal que decidía los trabayos pa les meyores comuñales, establecíen alcuerdos o solucionaben los problemes de convivencia del propiu pueblu o colos colindantes, asina surdió esta democracia abierta na que toos teníen voz y votu. Equí tenemos el principiu básicu de la creación de los actuales conceyos.
Xulio Concepción establez una serie de clasificaciones pa encuadrar tolos topónimos lo que non óbice por que un conceyu pueda tar en distintos llugares d’esta organigrama.
L’agua como elementu básicu sobro’l que pivota la vida antiguo y actual arrexunta a munchos conceyos. Les agües, ríos, regueros, llagos y demás zones venceyaes yeren consideraes poles civilizaciones antigües como divinidaes, recordamos les nueses xanes, Grecia, Roma o na India siguen esti patrón. L’agua apurría salú, fertilidá, alimentación, fuerza motriz, pureza.
Rellacionáu cola agua de los altores tenemos Ayande, Ayer, Ibias, Illas, Piloña, Riosa o Les Regueres. Si baxamos a los valles apaecen Amieva, Llangréu, Mieres, Ponga, Pravia, Ribesella, Ribedeva, Salas, Sariegu o Siero.
Formes xeográfiques venceyaes a calces d’agua: Bual, Cangas, Cangues d’Onís, L.lena, Nava, Navia, Noreña, Uviéu, Sotu’l Barcu, Valdés, A Veiga, Villaviciosa. Los antropónimos son nomes personales que se venceyen con fundadores, posesores de villes, pueblos o feudos, la mayor parte d’orixe llatinu, venceyaos con dellos conceyos: Avilés, Bimenes, Casu, Coaña, Eilao, Llaviana, Proaza, Santirso d’Abres, Taramundi, Tinéu.
El paisaxe con tolos sos detalles inflúi coles mesmes en munchos llugares. Nun hai más que mirar con güeyos interesaos la orografía del Principáu y la situación de cada conceyu.
Poles formes tendríamos l’orixe de Belmonte, Cangas, Cangues d’Onís, Llanes, Llanera, L.lena, Nava, Navia. Influyíu pola predominancia de les roques (kar- como raigañu) taríen Cabranes, Candamo, Caravia, Grandas de Salime, Xixón, Quirós. Les roques yeren un elementu esencial na vida de los primeres pobladores de la cortil asturiana. Les roques sirvíen pa construyir, como abellu pos les cueves o torques yeren importantes, como llugar con camperes pa los ganaos o pa poder cazar.
La posición xeográfica entendería a Somiedu (lo más alto), les dos Peñamelleres, l’Alta y la Baxa, al igual que Sobrescobiu. Si s’atien al allugamientu nuna fastera o sobro’l ríu taríen Ribedeva, La Ribera. Pezós podría venir de la forma de los montes, bien nidios, redondos en forma de tetu. Tapia de Casariego y Muros de Nalón seríen una llende del terrén.
Venceyáu a les viviendes antigües o más recién taríen Castrillón que seria castru grande; Castropol, Teberga, A Veiga, Vilanova d’Ozcos. Los caminos tan importantes en tiempos pretéritos dieron llugar a Carreño, llugar de dos tales carreteres pal acarretu de les sos frutiegues tierres de llabor.
Los animales básicos na economía de los nuesos antepasaos dieron llugar a Cabrales y Corvera (cuervos). Les plantes predominantes na xeografía conceyil fundinse nos raigaños toponímicos de Sotu’l Barcu, Colunga (tierra de colonos, de semaos) o Villaviciosa (villa granible). El Franco vien de la so posición clave nel Camín de Santiago, probablemente va sieglos tenía un réxime fiscal qu’eximia de ciertos impuestos, un llugar llibre.
Los antiguos cultos a divinidaes de too tipu dieron llugar a Degaña (decania d’un monesteriu), San Martin d’Ozcos, Samartín del Rei Aurelio, Santalla d’Ozcos, Santo Adriano. El casu de San Martin podría remontase a un cultu al dios de la guerra Marte al cristianizalo. Equí podríamos encuadrar unu de los posibles oríxenes del nome de la capital del Principáu. Nel raigañu indoeuropéu dew (rellumu, lluz o divinidá) que derivó en llatín a Iupiter, Iovis, Iovetum qu’acabó cristianizado como Ovetao, Anque otru orixe baraxáu pol cronista l.lenizu rellacionase cola gran presencia d’agua, como les famoses fontes y regueros del monte Naranco.
Pal orixe de Xixón reafitase en roca, del llatín saxum, que podría encontase nel orixe de la ciudá de la Campa Torres o inclusive la importancia del Cabu Peñes como elementu xeográficu importante pola cercanía.
Otru conceyu que presenta munches duldes ye Morcín. La solombra del Montsacro ye allargada, el cultu cristianu actual pudo sustituyir xuna adoración remota a la deidá guerrera de Marte, dende ende pasaríase por Martecini, Mortecini hasta llegar el nome actual. L’autor l.lenizu baraxa tamién otra vía etimolóxica: cree que la imaxinación popular, un cambéu de fonemes y el pasu del tiempu fixo apaecer un antiguu posesor llatinu Mauricius. Yernes y Tameza ye un casu singular que podría venceyase con una divinidá o cultu prerromanu na palabra Yernes, ente que del sanscrito podría venir un raigañu pal segundu como llugar escuru o visiegu o tamién, dende’l llatín rellacionáu cola agua.
Esti trabayu d’investigación de Xulio Concepción va siguir ampliándose nun futuru, coles aportaciones d’un equipu, asegura que va convertise nun llibru. «Los topónimos tán rellacionaos, non pueden tomase de forma aisllada. Esisten munches asociaciones y posibilidaes d’estudiu tantu documental como de campu», afirma. «Los investigadores del terrén» van siguir na fienda en busca del nome perdíu.
