Mientres la tarde-nueche d’esti vienres rexistráronse bastios localmente fuertes y acompañaos de nubes en sector oriental que provocó alzar a naranxa l’avisu na mariña de dichu sector prácticamente sobre la marcha. El sábadu, sicasí, va presentase una xornada bastante más estable. Vamos tener nubosidá variable mientres la mañana pero, a lo llargo del día, dirán abriéndose grandes claros que van empezar pola mariña y van estendese escontra l’interior. Comoquier, mientres la tarde van apaecer nubes d’evolución que podríen dexar dellos bastios débiles escontra’l cordal pero que, a priori, nada van tener que ver cola intensidá de los que se rexistraron especialmente nel oriente asturianu. Los vientos van ser fluexos con dalguna racha moderada na mariña. Les temperatures máximes van xubir llixeramente n’occidente, van baxar nel cordal y van caltenese ensin cambeos nel restu. Les mínimes apenes van variar respectu al vienres.
El domingu esperamos amanecer con nubes baxes na mariña y nel interior central, y con grandes claros nel restu. Estes nubes baxes van sumir y, especialmente a partir del mediudía, ye bien probable que predomine’l sol en prácticamente tola metá norte. Sicasí, van dir aumentando les nubes pel sur y nun se refuguen precipitaciones débiles a la fin de la tarde.
