Esperamos cielos bien nublos polo xeneral con posibilidá de delles precipitaciones débiles. A lo llargo de la tarde prevese que les nubes sían cada vez menos compactes y puedan dise abriendo claros nel cielu, sobremanera na mariña y zones de la metá norte asturiana. La probabilidá d’agües pela tarde va ser más baxa, pero asina tou nun se refuga qu’entá puedan escapase dellos bastios nel cordal. Tocantes a les temperatures, les máximes van xubir de forma xeneralizada. Esta xubida va ser muncho más significativa cuanto más movamos escontra’l sur de la rexón. Nel cordal van xubir hasta 6 ºC, nel restu del interior hasta 4 o 5 ºC, y na mariña y zones próximes hasta 2 o 3 ºC. Les mínimes van xubir llixeramente en puntos del interior occidental y nel sur d’Asturies, calteniéndose ensin cambeos nel restu.
El sábadu volveremos tener nubosidá pela mañana pero con posibilidá de delles escamplaes pela tarde. Les precipitaciones, nel casu de dase, van ser débiles y ensin importancia. Les temperatures van ser bien similares, salvo nel cordal onde podríen baxar un poco.
Pocos cambeos para’l domingu, pero’l llunes va ser un día bien paecíu a esti miércoles pasáu con nubes, agües y un descensu térmicu notable.
