Dende güei y hasta’l domingu hai nueve cites cola música n’asturianu repartíes pel centru y l’occidente del país. Ente elles alcuéntrase la continuación d’eventos qu’axunten una montonera actuaciones como’l XXVIII Festival Intercéltico d’Occidente y el XXV Festival Internacional de Bandes de Gaites Villa de Xixón. Amás hai dellos conciertos nos que van sonar estilos nos que la música tradicional ye la protagonista xunto a otros estilos como la electrónica.
Toquen Anabel Santiago nes Fiestes de Ferroñes (Llanera) el vienres el 8 a les 22h; Bimenes Underprau n’El Manglar d’Uviéu el sábadu 9 a les 12h; Carlos Velasco y Chino El Indio en Santu Adrianu (sábadu 9 a les 19.30h); Berto Varillas y Asturiana Mining Company n’El Franco (día 9 a les 21h); la Banda Gaites El Trasno en Grandas de Salime (domingu 10 a les 11.30h) y Felpeyu nes fiestes de La Corrada de Sotu’l Barcu (día 10 a les 21h).
Tamién destaca la folixa que pon el ramu al proyectu Tocando Raíces. Nél va haber una amuesa de les artistes residentes Ana Pereda, Eva Outeiro y Manon Siv Duquesnay qu’esperimentaron col patrimoniu musical asturianu. Amás va haber espicha, conciertu y pinchada de Ferla Megía y espaciu abiertu pa que quien quiera pueda tocar.
Tola programación detallada d’equí a los próximos meses pue vese na Axenda de Musicasturiana.com.
