L’asociación cultural «Genialogías» y l’editorial Pintar-Pintar publiquen un volume qu’arrexunta poemes de 38 artistes y dibuxos de 39 ilustradores. LNE
Por la izquierda, Cristina Grisolía, Paula de la Fuente, Olvido Andújar, Ester Sánchez, Berta Piñán, Eva Navarro, Luisa Antolín y María Rosa Serdio. / Marcos León
D’una grana nació una antoloxía. Nun ye fácil atopase anguaño un recopilatorio de poemes dedicaos al públicu infantil, pero para l’asociación de muyeres poetes, «Genialogías», un difícil nun ye un imposible.
La idea surdió de Luisa Antolín n’una de les asamblees y foi rápido aceptada pol restu d’integrantes. Una antoloxía de poemes nos que «recoyer la tradición y les voces d’autores que nun escribieron poesía infantil», esplicó Antolín. Asina nació «Vientos verdes. Genias de la poesía. Antoloxía Ilustrada», presentáu ayeri na biblioteca d’El Natahoyo dientro de los actos del Poex.
Gran parte del méritu qu’esta publicación tea güei na cai tamién se debe a la editorial Pintar-Pintar que se comprometió dende’l primer momentu con un proyectu que llogra «daqué bien senciellu nos tiempos que vivimos». «Esta publicación recuerda que ser llibres na mirada, lleer con aselu y ser senciellos tamién ye una forma de resistencia», detalló Ester Sánchez, editora de la publicación y moderadora de la mesa redonda na que participaron dalgunes de les antólogues como Eva Navarro, Cristina Grisolía o Olvidu Andújar.
Tamién participó nel coloquiu Berta Piñán, exconseyera de Cultura del Principáu que resaltó’l llabor de «Genialogías», una asociación que foi atopando pel camín el so oxetivu. «Va años llegamos a la conclusión de que fuéramos educaes na ignorancia de la esistencia d’una tradición que nos pertenecía y fuéranos arrampuñada. Teníamos el deber de recuperala», recordó Piñán, demostrando como esta antoloxía ye’l gran símbolu d’esa reconquista cultural.
Los años de trabayu na obra resultaron nun compilatorio de poemes onde participen 38 poetes y 39 ilustradoras. «Queríamos un llibru bellu y acabóse convirtiendo en tou un árbol enredadera pensáu al públicu infantil, pero que puede ser lleíu por toos», esplicó Antolín, pela so parte. Col amor pola poesía como bandera, la resultancia foi más que satisfactoriu pa les muyeres que participaron na so creación. «Un furacán», en palabres d’Antolín, nel que mozos y non tan nuevos pueden dexase llevar.
Esta antoloxía ilustrada naz del impulsu de l’asociación feminista de muyeres poetes Genialogías, que’l so trabayu tien como oxetivu espublizar y sofitar la poesía escrita por muyeres. Dende esi propósitu surde Vientos Verdes. Genias de la poesía, un proyectu que quier contribuyir a arriquecer l’universu poéticu que s’ufierta a neñes y neños, dando a conocer a autores referentes na poesía universal y celebrando tamién a les autores imprescindibles na poesía empobinada a públicu infantil.
