El Serviciu de Salú del Principáu d’Asturies (SESPA) convoca, por cuenta del Día Mundial de la Salú Mental, trés concursos empobinaos a la ciudadanía cola mira de fomentar la conciencia del cuerdismu, la prevención del estigma y garantizar los derechos y el bon tratu de les persones con discapacidá psicosocial y/o problemes de salú mental. Normalizacion Llinguistica
Estos concursos son:
- Concursu de cómic. Cunta con dos premios, ún pa trabayos individuales y otru pa trabayos grupales, dotaos caún con un primer premiu de 1.100 euros y un accésit de 600. Los cómics que se presenten han tener una estensión de 2 a 6 páxines.
- Concursu de cartelos: Cunta con dos premios, ún pa trabayos individuales y otru pa trabayos grupales, dotaos caún con un primer premiu de 1.000 euros y un accésit de 500. Almítense trabayos dixitales o físicos fechos con técniques de cualquier tipu.
- Concursu de rellatos: Hai dos categoríes: xuvenil (de 12 a 18 años) y adultos. La categoría xuvenil va tener un primer premiu de 600 euros y un accésit de 300, contra xustificación del gastu en material electrónico o escolar. La categoría adulta va tener un premiu de 1.200 euros y un accésit de 600 euros. Los rellatos que se presenten han tener una estensión máxima de 3 páxines.
Los trés concursos almiten participaciones en castellanu, asturianu y eonaviegu y tienen de plazu d’entrega hasta’l 30 de xunetu del 2026.
Les convocatories completes pueden consultase nel BOPA del 27 de marzu del 2026.
