Un añu dempués de la publicación de ‘Páxaros 01’, @ferlame torna con ‘Páxaros 02’, el so trabayu nuevu formáu por seis cantares 🐦⬛🐦⬛ Nesti álbum pueden sentise una mecigaya d’estilos musicales que van de la música tradicional al rap, pasando pel ambient, el pop, la electrónica o’l boleru. Musicasturiana.com /@somoslacre
L’artista sierense llanza seis cantares que caleyen pente la música tradicional el rap, l’ambient, el pop, la electrónica o’l boleru.
Un añu dempués de la publicación de Páxaros 01, Ferla Megía torna con Páxaros 02, el so trabayu nuevu formáu por seis cantares. Nesti álbum pueden sentise una mecigaya d’estilos musicales que van de la música tradicional al rap, pasando pel ambient, el pop, la electrónica o’l boleru. Too ello amuesa la versatilidá d’esti artista que ganó’l mes pasáu el XVII Premiu Camaretá al Meyor Cantar n’asturianu
«Cuando llancé’l primer EP, Páxaros 01, fici una esbilla ente dellos cantares que tenía grabaos dende’l 2022 y al escoyer seis sentí que los había mui guapos ente les que quedaron fuera; por eso qu’a les del añu pasáu llaméles 01 y esti ye 02«, desplica’l músicu sierense faciéndose tamién una entruga: «¿Quién sabe si tovía pue salir un 03?«.
Esti trabayu afonda nel personal y mui plural estilu de Megía que transita dende sonoridaes más apegaes a la música tradicional -‘MIÑANCES’23’ y ‘Redobla’-, a soníos más vanguardistes como los que se pueden sentir en ‘tiempu !’ y ‘llover’, esta última con un chisgu a los cordobeses Viva Belgrado. Amás, l’EP tien la collaboración de dos destacaes voces de muyer de la escena d’Asturies: la de Tania Pereira en ‘Conseyu’ -que foi’l primer adelantu del EP- y Rita Ojanguren, qu’acompaña a Ferla en ‘NUN’, pieza que zarra l’EP a ritmu de boleru.
Como puntu d’alcuentru ente Páxaros 01 y Páxaros 02 tán «les referencies al monte, a los mios collacios, a los momentos fugaces, a les alcordances, a la frustación… y a la fin a metáfores que munches vegaes facíen referencies a páxaros o a la fauna llocal», desplica Megía al rodiu d’estos dos trabayos que siguen tamién la llóxica del DIY, al tar compuestos, producíos, grabaos y diseñaos dafechu por él.
Edición física y xira
Estos dos EPs van dar forma a una cuidada edición física en CD y vinilu que va ver la lluz a primeros del 2026 y que publica Lacre, l’axencia de contratación de Ferla Megía. El llanzamientu de güei en formatu dixital vien acompañáu del aniciu d’una xira nueva qu’entama’l martes 9 d’avientu nel conciertu que promueve Radio3 pa festexar el 30 aniversariu de la reinaguración del Teatru Xovellanos. A esti va siguir el 20 febreru nel Café & Pop Torgal d’Ourense, el 28 febreru na Taberna Narciso de Teberga y el 4 de marzu nel ciclu Encaja2 de Xixón.
