Uviéu conéctase con Hawkins: apaez una alcantariella de «Stranger Things» n’una céntrica cai de la ciudá. Netflix escoyó la capital del Principáu para una campaña na que participen otres cuarenta ciudaes. Cai/ Charles Darwin, 5. Reel / LNE
Uviéu cuélase n’una de les campañes urbanes más orixinales y sorprendentes n’enforma tiempu: 41 arquetes de Telefónica decoraes por toa España con escenes de la esitosa serie de Netflix «Stranger Things», instalaes hasta’l llunes para celebrar el desenllaz de la serie. Y sí, una d’eses tapes aterrizó xusto na esquina de Charles Darwin con Carlos López-Otín, onde nin los xueces de la nueva see xudicial esperaben atopase a un Demogorgon –unu de los personaxes monstruosos de la ficción– na cera.
La tapa —que davezu sería un cuadráu metálicu más, condergáu a ser triáu ensin gloria— agora presume de grabáu: el nome de la serie, los protagonistes de la ficción en bici camín de dalgún llíu y, poques gracies, un demogorgon acesmando dende’l Mundu del Revés» con tola elegancia que dexa tar fechu de metal fundíu. Ye lo más barganal que tuvo Llamaquique d’unu resquiebru interdimensional… salvu cuando hai obres, claro.
«Ye una pasada, vaya gran idea tuvieron», comenta Gisela Álvarez, fan declarada de la serie que’l pasáu 26 de payares estrenó la temporada definitiva y va desvelar los sos últimos episodios el día d’Añu Nuevu, mientres caminaba tan sele hasta que la cera llanzó-y un mensaxe de pura ciencia-ficción. Ella nun foi la única sosprendida.
A los pocos minutos, la tapa yá atropaba miraes, semeyes, rises y dalgún pequenu alderique sobro si, en casu d’emerxencia sobrenatural, yera prudente triala o meyor arrodiala. «Voi saca-y una semeya», anunciaba un repartidor de paquetería que nun duldó en baxase del furgón.
Anque Uviéu solo tien esta pieza única, forma parte d’una especie de gymkana partida pel país entamada por Movistar. Por una vegada, llevantar la vista del móvil puede llevar a afayar daqué más emocionante qu’un mensaxe de wasap.
