«Esti discu féciose dende la necesidá de crear utopíes horizóntiques que mos fagan baxar los pies a la tierra, y mos fagan entender y dixebrar lo importante de lo prescindible«. Son les pallabres coles que Rodrigo Cuevas entama los agradecimientos nel llibretu del so álbum nuevu, Manual de Belleza, que yá ta la venta en CD, en vinilu y en toles plataformes musicales. El «ministru de verbenes» regresa dempués de trés años con diez cantares onde l’amor, la utopía, l’autoestima, la llibertá y la diversión marquen el ritmu y el tonu de la obra más distinta d’esti artista.
Manual de Belleza entama con esa declaración d’intenciones que ye ‘Un mundo feliz’, el primer de los adelantos del discu y nel que collabora Massiel, reina del pop español que Cuevas reivindica y qu’algamó a poner delantre d’un micrófonu dempués de qu’ella llevara venti años retirada. Primera utopía baxada a tierra. Síguen-y otros nueve temes nos que pue sentise una bayura d’estilos que van dende’l rap de ‘BLZA’ -nel que collabora la mítica rapera Mala Rodríguez y nel que se nota la mano del so compositor, l’ex Calle 13 Eduardo Cabra-, al boleru de ‘Xardineru’, pasando pel postpunk de ‘Una muerte ideal’, el tradi-tune deprendíu de Concha i Clara de Tresmonte ‘La hermana cautiva’, o’l mamarrachéu discotequeru de ‘La Playa’ y ‘Asturcón’. Too ello ensin escaecer la presencia de la música tradicional peninsular -‘Sácame a bailar’, ‘El pañuelín’ y ‘La fiesta’-, que lleva acompañando a esti artista dende Manual de Cortejo y que nesti discu cortexa con influencies d’otros estilos y una producción actual.
Y si l’álbum arranca cola utopía cantada de ‘Un mundo feliz’, les demás lletres siguen esa llinia na que se canta a la guapura de la vida. «Yo soy la belleza, dicen que todo lo puedo, me tiro a las calles, me paseo por Oviedo, hago que las perras adoren a sus cachorros, y que los señores me queráis comer los morros». Rapea Rodrigo Cuevas nun exerciciu d’arguyu y autoestima nesti trabayu nel que tamién hai pasión asturcona, dedicatoria a esi gran Galán col que’l músicu riega la so vida, crítiques a la turistificación, muncho amor, y hasta una manera distinta de mirar a la muerte. Too ello entemeciendo castellanu, amestáu y asturianu, llingua esta última que ta más presente que nunca nun discu d’esti carbayón nacionalizáu piloñés.
En comuña
Cantaba Nacho Vegas eso de «nos quieren en soledad, nos tendrán en común». Y asina ye como Rodrigo Cuevas reivindica tamién la belleza de lo compartío, de lo colectivo. Nel curtiumetraxe musical que llanzó como adelantu, Llagares, yá andecharon más de cien persones, y nel discu participen d’una o otra manera munchos destacaos nomes amás de los yá mentaos Eduardo Cabra, Massiel y Mala Rodríguez: Ana Belén, Grande Amore, Mapi Quintana, Tarta Relena, Carlos Fernández, PAN.SEN.FRON, Zahara, Martí Perarnau, Víctor Manuel, Rozalén, Celimonde… y una montonera d’instrumentistes. Amás, l’arte enllena esti trabayu, que tien una cuidada edición en vinilu, y que vuelve a ser obra del artista Ricardo Villoria.
Con Manual de Belleza -que yá pue mercase na tienda online de musicasturiana.com, na so oficina d’El Natahoyo y na tienda d’Uviéu de Puru Remangu-, Rodrigo Cuevas presenta la so cara más versátil y llibre, onde la utopía fai que s’alloñe d’encorsetase na tradición y, ensin escaecela, baille con otros estilos y seya quien a llevar a la música n’asturianu per caleyes nueves.
