Daniel Meré fai alcordanza de Robe Iniesta tocando a la gaita ‘La vereda de la puerta de atrás’
Hai una selmana finaba Robe Iniesta, cabezaleru del míticu grupu de rock estatal Extremoduro. La so perda tuvo reacciones per parte de persones y entidaes mui estremaes de tol Estáu español y estos díes la música asturiana sumóse tamién a facer alcordanza de la figura de Robe con un videu publicáu por Daniel Meré.
- . Daniel Meré / Ver reel
El gaiteru bañugueru versiona ‘La vereda de la puerta de atrás’, cantar del 2001 que nos últimos años convirtióse nos temes más populares d’esti grupu, sobre manera ente la xente más mozo, por mor de facese viral en TikTok.
Cola publicación d’esti videu nuevu -que yá acumula más de 10.000 reacciones n’Instagram- esti gaiteru profesional sigue nel so llabor d’asoleyar versiones a la gaita de temes mainstream como’l ‘Quédate’ de Quevedo y BZRP, col que se fixo viral en TikTok y n’Instagram. Amuesa asina la versatilidá d’esti instrumentu p’adaptase a les corrientes musicales más actuales y distintes a la tradición.
Acullá d’esto, Daniel Meré (1997) lleva dende neñu tocando la gaita; tien formao parte de varies agrupaciones de música tradicional; fixo’l Grau n’Enseñances Artístiques Superiores de Música na primer promoción na que s’implantaron los estudios reglaos d’Interpretación de los Instrumentos de la música tradicional y popular d’Asturies; y ye’l cabezaleru de la Banda Gaites Cabu Peñes. Nesta entrevista publicada en musicasturiana.com a primeros d’esti añu pue conocese más del so llabor.
