Un tiburón foca apaeció muertu na sablera de L.luarca. L’escualu tien un pesu d’unos 30 quilos, tien unu llargor de 1,40 metros y desconócense les causes que provocaron el so fallecimientu.
Conocíu como Centroscymnus coelolepis o Pailona, el tiburón foca ye capaz de soportar presiones de 350 atmósferes y buscar la so comida a fondures d’hasta 3.500 metros. Aliméntase principalmente de pexes y cefalópodos, gasterópodos y cetáceos. El Comercio
Ye un gran depredador y tán documentaos ataques d’esti tipu de tiburón a calamares xigantes como’l Taningia Dánae.
Va dellos años pescábase nel Cantábricu al pie de otros tiburones de fondu como Centrophorus squamosus y Centrophorus granulosus, principalmente para’l llogru d’aceite por aciu la fermentadura del so fégadu, la so carne tamién yera comercializada para’l so consumu, siendo esportada a delles zones del Mediterráneu. Por cuenta de la sobrepesca y al so lentu desenvolvimientu, les poblaciones resintiéronse, polo que la so pesca ta prohibida.
El so avistamientu por estes llatitúes ye bien raru anque se cree que pue tar venceyáu a l’apaición de munches foques nes mariñes asturianes poles corrientes marines.
