El Gobiernu d’Asturies entaína la xestión del acoso escolar con una nueva aplicación informática para los centros educativos. La ferramienta dexa, na so fase inicial, tramitar les actuaciones previes énte posibles casos ente l’alumnáu.
La Conseyería d’Educación punxo en marcha la primer fase d’una aplicación informática pa facilitar la xestión de posibles casos d’acoso escolar ente l’alumnáu. Esta ferramienta, denominada xenéricamente Acoso escolar, yá ta disponible pa les direcciones de los centros educativos.
El so oxetivu ye simplificar y entainar la tramitación de situaciones que puedan constituyir acoso. La etapa inicial ye clave, yá que dexa determinar si hai nicios abondos p’abrir un espediente formal o si, pela contra, nun alleguen les circunstancies necesaries. La mayoría de los casos denunciaos nun superen esa fase preliminar, lo que convierte esta aplicación nuna ferramienta útil pa la xestión diaria nos centros.
La conseyera d’Educación, Eva Ledo, unvió güei a los centros un boletín oficial sobro l’aplicación, nel que s’inclúi un enllaz d’accesu y un manual d’usu. El documentu esplica los primeros pasos pa utilizar esta ferramienta, según los accesos y funciones disponibles tantu pa los equipos directivos como pa la inspección.
Amás, yá se ta trabayando nuna segunda fase de l’aplicación, que va dexar rexistrar y tramitar tolos casos d’acoso escolar que se detecten. “Esta ferramienta diseñóse a partir de la esperiencia acumulada nos centros y ta abierta a meyores. Ello ye que yá se ta ellaborando xuna fueya de ruta pa la so evolución nos próximos meses”, esplicó Ledo.
