El gaiteru asturianu Hevia va volver al escenariu del Teatru Xovellanos de Xixón el próximu 15 de mayu pa protagonizar un conciertu mui especial col que celebra los 25 años del Platinum Europe Award, el galardón que certificó’l so ésitu internacional y que supunxo un puntu d’inflexón na hestoria reciente de la música folk asturiana.
El gaiteru asturianu Hevia va volver al escenariu del Teatru Xovellanos de Xixón el próximu 15 de mayu pa protagonizar un conciertu mui especial col que celebra los 25 años del Platinum Europe Award, el galardón que certificó’l so ésitu internacional y que supunxo un puntu d’inflexón na hestoria reciente de la música folk asturiana.
Esti reconocimientu, algamáu gracies al impactu del álbum Tierra de nadie, convirtió a Hevia nun referente mundial y abrió nuevos caminos pa la gaita, que dende entós empezó a sonar n’escenarios de tol mundu con una propuesta innovadora, abierta a la fusión y a los llinguaxes contemporáneos.
Nel conciertu del Xovellanos, l’artista va ufiertar un percorríu polos temes más emblemáticos de la so trayectoria, nuna puesta en escena que combina tradición y modernidá, con soníos electrónicos y reafitando’l so compromisu cola cultura asturiana y la so proyección internacional.
La cita va tar arriquecida pola participación de convidaos especiales, que van aportar nuevos matices al espectáculu. Una d’elles ye Liuba María Hevia, destacada cantautora cubana y figura clave de la Nueva Trova. La so voz, marcada pola sensibilidá y el cuidu poéticu, va sumar un tonu íntimu y emocional al conciertu, nun alcuentru musical que simboliza’l diálogu ente distintes tradiciones culturales a dambes veres del Atlánticu.
Amás, el públicu va poder disfrutar de la actuación de Coros y Danzas Doña Urraca, históricu grupu folclóricu de Zamora fundáu en 1955. La formación, una de les más veteranes de Llión, va aportar danza tradicional y música popular, amestando movimientu, color y memoria colectiva a la propuesta escénica.
