RTPA / En 2014, recuperóse esta mazcarada ancestral, que yá ye tradición navidiega nel conceyu de Grau.
La mazcarada iverniza percuerre los pueblos de la parroquia. Tamos a les puertes de la Navidá y, con ella, vienen los Aguilandeiros de San Xuan. Ye una mazcarada iverniza, recuperada en 2014, que percuerre los pueblos de la parroquia pidiendo l’aguilandu.
En tractor fueron percorriendo la parroquia de San Xuan los Aguilandeiros. Una mazcarada navidiega na qu’esta comparsa, formada por una ventena de personaxes tradicionales, canta, bailla y, sobre manera, fai munches trastaes allá per onde pasa.
«El diablu», la dama yá´l galán», «l’osu yá´l amu», el cura, los vieyos, los maragatos, l’escobón, la cenicera y «el mélicu», ente otros personaxes, desfilaron polos pueblos pa pidir l’aguilandu navidiegu y semar un pequenu caos al so pasu.
Esti cortexu de singulares seres mazcaraos fueron recuperaos de la memoria d’antaño por Xosé Antón Ambás y Ramsés Illesies, artífices del Arquivu de la Tradición Oral d’Ambás. Gracies a ellos yá van once años de coloríu (y daqué gamberru) percorríu polos pueblos de la zona, con salida del Albergue de Pelegrinos de San Xuan de Villapañada.
Una llabor que tien los sos frutos, porque si hai numberosos personaxes, el públicu cada añu ye más nutríu, con visitantes que lleguen a Grau dende puntos tan distantes como Soria pa vivir la esperiencia en primer persona.
Y too pa ganar l’aguilandu, pero tamién pa entretener a los cientos d’asistentes que los siguen nel so festivu periplu.
