Hai unes selmanes Goxe Producciones asoleyaba l’Anuariu de la Música Asturiana 2025. Y, como ye vezu, nél recuéyense delles collaboraciones de miembros de la Fundación Belenos. Xixu Ariza en Pieces. / Musicasturiana.com/ Esta selmana entama la distribución d’esta publicación que repasa a lo llargo de 124 páxines tolo que dio de si la escena’l pasáu añu. Descargar PDF, por cortesía de Goxe Producciones.
Asina, Berto Peña descúbremos «Dellos músicos populares del conceyu d’Uviéu», nomes munchos yá escaecíos de xente que tocaba peles romeríes del conceyu; Ignaciu Llope firma «Tradición y folclor: de la voz de la tierra a la voz del pueblu», un averamientu a la visión que’l filósofu y políticu italianu Antonio Gramsci tenía sobre la cultura y música populares; y Daniel Cueli firma trés cróniques nes que recueye’l percorríu de la música celta n’Asturies demientres l’añu pasáu: con «Un añu importante pa la gaita» fae repasu de los asocedíos más importantes usando de filu conductor el nuestru instrumentu más emblemáticu; en «Asturies, escenariu celta» repasa los conciertos que n’Asturies dieron grandes grupos ya intérpretes del Arcu Atlánticu (Carlos Núñez, Altan, Skolvan, Rura, Malin Lewis…) y, por último, fala de la presencia en Xixón de los responsables del Celtic Connections y del Festival Interceltique de Lorient p’asistir al II Alcuentru Profesional Música en Rede.
Fundación Belenos
L’Anuariu de la Música Asturiana llega un añu más fiel a la so cita per estes feches y failo con un repasu fondu a lo que dio de sí’l pasáu 2025. Como de costume les temátiques d’esta publicación editada por Goxe Producciones céntrense n’estilos como la música tradicional, el folk, el rock o la canción d’autor, con secciones qu’inclúin reportaxes, informes, entrevistes, crítiques, opinión, recoyida de material o anuncies. Yá pue lleese la versión dixital en Musicasturiana.com y a a lo llargo d’esta selmana van repartise los exemplares gratuitos nos puntos de distribución habituales.
L’Editorial, nesta ocasión, titúlase «Música asturiana viva y en vivo» y nél fálase de la importancia de los festivales medianos y pequeños, xeneralmente autoxestionaos, que se desarrollen a lo llargo de la xeografía asturiana, armando una rede de cites cola música fecha equí imprescindible pa la so promoción y afitamientu; nesti sen, manifiéstase: «A l’alministración pública asturiana correspuénde-y apoyar decididamente estos festivales, polos beneficios añadíos que tienen pa los entornos nos que se desenvuelven, especialmente aquellos entamaos en zones rurales o alloñaes. A la RTPA hai que pidí-y que cubra amañosamente tola información y desarrollu de los mesmos, amás de convertise nuna ferramienta de la so promoción. Sicasi, lo primero qu’hai que facer ye felicitar a les persones, asociaciones, colectivos, comisiones, etc. que tán detrás d’estos eventos, porque cola so xera tán faciendo que la música asturiana siga viva y en vivo».
En cuantes a los conteníos, destaquen la crónica titulada «Un añu importante pa la gaita» (resume de l’actividá alredor d’esti instrumentu); los informes «La elegancia de la música asturiana» (sobre les formaciones nueves de la escena folk) y «La mocedá garra puxu na música asturiana» (alredor del relevu xeneracional); el reportaxe «El ‘Soníu Avilés’ na música celta: xénesis y evolución d’una identidá» (centráu nos grupos avilesinos y les sos asemeyances), l’estudiu «El Compañero Paredes trata de organizar un Orfeón Obrero» (repasu históricu a les conexones ente movimientu obreru y les agrupaciones corales asturianes); o les entrevistes a Marisa Valle Roso, Rubén Bada y Héctor Braga, presentando los sos trabayos discográficos nuevos.
Collecha y discu
L’Anuariu zárrase, como siempre, cola sección «Collecha», onde apaecen les producciones musicales y bibliográfiques del 2025. El volume compleméntase con un discu nel que se recueyen muestres de lo meyor qu’ufiertó l’añu, con venti cortes d’estilos como’l folk, el rock, el pop o la canción d’autor, con artistes y grupos como Corquiéu, Felpeyu, Alienda, Los Berrones, Skama la Rede o Ochobre.
