Berta Piñán gana’l cuartu Premiu Nacional de Lliteratura Asturiana convocáu pola ALLA. Ye un galardón que convoca l’Academia de la Llingua Asturiana. L’acta empondera la calidá lliteraria de l’autora canguesa y ex-conseyera de Cultura y, sobre manera, la fondura d’una poesía sensible y abierta a los problemes cotidianos. La obra de Piñán, según el xuráu, contribuyó a dignificar y sopelexar la cultura asturiana fuera de la comunidá. El galardón apurriráse’l 8 de mayu, Día de les Lletres Asturianes, nel teatru Campoamor.
Llueu de tomar la pallabra tolos miembros del Xuráu, y tres del alderique correspondiente, fíxose la votación na que, por unanimidá, decidióse conceder el premiu a la escritora Berta Piñán Suárez.
Nel acta, el xuráu xustificó d’esti xeitu la decisión de concede-y el Premiu Nacional pola calidá d’un facer lliterariu que percuerre’l panorama asturianu de los caberos cuarenta años y nel que destaca la fondura d’una poesía sentida, sensible, abierta a los problemes cotidianos y del mundu y d’una bayurosa orixinalidá.
Ye destacable, al empar, la coherencia d’una espresión narrativa na que l’apegu al territoriu y el tratamientu de tipos humanos cercanos dexa, xustamente, la posibilidá de la so interpretación universalista. La contribución de la obra lliteraria de Berta Piñán a la dignificación de la lliteratura asturiana, del so espardimientu fuera de les llendes d’Asturies y, a lo cabero, la so grandísima y decisiva importancia nel procesu de recuperación llingüística n’Asturies, afiten el sentir del xuráu a la hora de conceder el Premiu Nacional a una obra y a una persona que, de xuru, puen calificase como esceicionales y decisives nel valir actual de les nueses lletres.
El Premiu Nacional de Lliteratura, amás del correspondiente medayón conmemorativu y la edición d’un llibru de síntesis de la so obra, cuenta con una dotación económica de 6.000 euros. Siguiendo’l vezu de les dos primeres ediciones, Berta Piñán Suárez recibirá públicamente’l so gallardón dientro de los actos del Día de les Lletres Asturianes, previstos pa la tarde del 8 de mayu del 2026, nel Teatru Campoamor.
Uviéu, 22 de xineru del 2026
