El Principáu amplía’l serviciu de comedor escolar y l’enseñanza del asturianu nun cursu marcáu pol pactu ‘Asturies Educa’. La conseyera Eva Ledo presidió güei les xuntes d’entamu de cursu coles direcciones de los centros públicos y alcordose que “Tán cumpliéndose los calendarios establecíos y tamos intentando entainalos na midida de lo posible”, afirmó la titular d’Educación. Los centros tendrán de disponer d’un programa de prevención contra l’acoso escolar. Actualidá Asturies
Ente les principales novedaes, destaquen la estensión del serviciu de comedor a los meses de setiembre y xunu, la implantación del asturianu nel segundu ciclu d’Infantil y nes Escueles Oficiales d’Idiomes o’l desenvolvimientu del pactu Asturies Educa.
La conseyera Eva Ledo, acompañada polos cinco directores xenerales, el secretariu técnicu y les xefes de serviciu del so departamentu, presidió nel salón d’actos del IES Aramo, d’Uviéu, los trés alcuentros consecutivos coles direcciones de Secundaria, Formación Profesional y otres enseñances; d’Infantil, Primaria y Centros d’Educación Especial; y cola rede alcordada.
L’ampliación del serviciu del casi centenar de comedores escolares dependientes de la conseyería va llevase a cabu esti mes de setiembre con dos fórmules distintes. Unos centros van realizar un reaxuste del horariu del tresporte escolar, ente que los colexos onde nun resulta posible esa opción van cuntar con un serviciu estraordinariu de vixilancia pal alumnáu hasta la llegada del tresporte. El restu del cursu’l serviciu de comedor va caltenese como hasta agora.
La conseyera presentó’l pactu Asturies Educa, robláu pol Gobiernu con cuatro organizaciones sindicales y que supon xuna inversión de 45 millones na rede pública hasta’l final de la presente llexislatura. L’alcuerdu yá ta en marcha colos grupos de trabayu pa ellaborar el decretu d’equidá o la creación de la comisión de siguimientu del pactu. Ledo avanzó los recursos que se van enllantar dende l’empiezu del cursu.
Nel apartáu de desburocratización, ta preparándose un directoriu p’allugar modelos de documentos, guíes, protocolos o entrugues frecuentes, amás de l’automatización de procedimientos. Tamién se presentó un portal con accesu a distintes prestaciones pal profesoráu, ente elles, comunicar a les families les faltes d’asistencia del alumnáu o llograr el carné del docente.
“Tuvimos avanzando’l trabayu realizáu mientres el branu y l’estáu en que s’atopen toles actuaciones comprometíes dientro del pactu, del que tamos satisfechos cola so evolución”, esplicó la conseyera. Ledo añedió que se tán cumpliendo los calendarios establecíos y tamos intentando entainalos na midida de lo posible”.
La conseyera detalló tamién la recién aprobación de los dos decretos pa estender la enseñanza del asturianu y, nel so casu, del eonaviego. El primeru d’ellos va dexar enllantalo, per primer vegada y de forma voluntaria, nel segundu ciclu d’Infantil na área denominada Comunicación y representación de la realidá. Más de 6.000 estudiantes yá se matricularon pa esti cursu inaugural. L’otru decretu regula la so implantación nes Escueles Oficiales d’Idiomes, onde se ta peracabando l’apertura d’un periodu d’inscripción.
Coles mesmes, avanzóse un calendariu coles distintes normes que se van a ellaborar dende la conseyería, ente elles, l’alcuerdu de plantiyes o la revisión del resolvimientu, de 6 d’agostu de 2001, relativa a la organización y funcionamientu de los centros.
Prevención del acoso escolar.
Otru asuntu tratáu foi la prevención del acoso escolar. El nuevu decretu autonómicu atópase n’ellaboración y concluyó apocayá la fase de consulta pública previa. Amás, tolos centros tendrán de disponer d’un programa preventivu. Dende la conseyería va realizase una convocatoria pa formar a aquellos centros comenenciudos nel programa Tutoría Ente Iguales (TEI).
Per otru llau, informóse de la continuidá de los programes PROA+ y de refuerzu de la competencia llector y matemático, impulsaos el cursu pasáu pol gobiernu central; de les meyores de la estratexa d’autismu, na qu’Asturies ye la comunidá pionera; del aumentu de les aules abiertes hasta la trentena y con refuerzu del personal, o de les novedaes del proyectu Educastur Radiu, qu’inclúin la celebración n’ochobre d’un congresu nacional de radio escolar n’Asturies.
Tamién se faló de la nueva regulación del usu de los dispositivos móviles como ferramientes pedagóxiques complementaries nes aules, na que’l Serviciu d’Inspección Educativa va emprestar asesoramientu a los centros; o de la medría de 105 a 110 euros de les ayudes pa llograr llibros de testu en réxime de préstamu en centros d’enseñanza públicos.
