TPA /
L’entamu del cursu entama con una xornada de convivencia colos vecinos afectaos poles quemes. El Colexu Rural Axuntáu Ríu Cibea, en Cangas, treslladó’l so entamu de cursu a Xinestosu, d’onde son dalgunos de los sos alumnos, nuna xornada de convivencia colos vecinos afectaos poles quemes. Nel actu nun faltaron bomberos, BRIF, cazadores y cooperatives forestales a quién-yos apurrieron un diploma pol so llabor na estinción de quemes nes últimes selmanes.
Los alumnos del CRA Ríu Cibea, en Cangas, comprométense a ser guardianes d’esta tierra y curiar y protexer el so valle, unu de los más afectaos poles quemes d’agostu. Munchos de los sos alumnos, vecinos de Xinestosu, Sonande y L.lamera fueron testigos directos del fueu.
Nesti entamu de cursu, alumnos y profesores quixeron compartir colos vecinos un mensaxe d’esperanza, preparando tiestos con grana y pensamientos de concienciación ambiental y sofitu.
Nel actu homenaxóse, amás, a bomberos, BRIF, cazadores, vecinos, cooperatives forestales y Conceyu pol so llabor na estinción del fueu.
L’actividá busca que los alumnos se sientan parte activa de la so redolada, arguyosos de los sos raigaños y protagonistes del cuidáu y caltenimientu del so patrimoniu cultural y natural.
