El Gobiernu va declarar los horros del norte d’España, ente ellos los asturianos, Patrimoniu Cultural Inmaterial. La Conseyería de Cultura califica de «finxu» la midida, impulsada pol ministru Urtasun pa salvaguardar esi patrimoniu pa les próximes xeneraciones, pol so valor arquitectónicu y como símbolu d’identidá Centro d’Interpretación del Horru en Bueño, en La Ribera. LNE /
Centru d’Interpretación del Horru en Bueño, en La Ribera. / LNE
El Conseyu de Ministros va aprobar la selmana que vien, el martes 7 d’abril, a propuesta del titular estatal de Cultura, Ernest Urtasun, el Real Decretu pol que se reconoz oficialmente a los horros del norte de la península ibérica, ente ellos los asturianos, como Manifestación Representativa del Patrimoniu Cultural Inmaterial, como vehículos de tresmisión y espresión simbólica d’identidá .
La declaración non solo ye una reconocencia al valor arquitectónicu d’estes construcciones tradicionales sinón tamién al ampliu conxuntu de conocencies, oficios, práctiques sociales y memories compartíes que les comunidaes norteñas desenvolvieron en redol a elles.
L’Executivu nacional sorraya, al informar de la reconocencia, que los horros constitúin un capital cultural inmaterial “contemporaneu y complexu”, frutu de sieglos de tresmisión y adaptación a les necesidaes del mediu rural. Asociaos al almacenamientu de granu y alimentos, fueron tamién espacios simbólicos amestaos a la organización social, les tradiciones familiares y la memoria rural y desempeñaron históricamente un papel esencial como marcadores culturales y espresiones d’identidá colectiva.
L’oxetivu principal de la midida ye reforzar salvaguardar d’esta dimensión inmaterial por aciu la so incorporación esplícita a los procesos d’identificación, documentación, estudiu y espardimientu del patrimoniu cultural. Con ello, el Ministeriu de Cultura pretende consolidar la reconocencia institucional de los horros y asegurar el so preservación y tresmisión ente xeneraciones.
El Gobiernu d’Asturies celebró la decisión adoptada güei pol Conseyu de Ministros y considera qu’esta declaración supon un finxu na puesta en valor d’unu de los elementos más representativos de la identidá del territoriu asturianu y un respaldu directu a los sos esfuerzos pa garantizar el so preservación integral. La conseyera de Cultura, Vanessa Gutiérrez, manifestó que «esta reconocencia estatal refuerza y legitima l’intensu trabayu impulsáu n’Asturies p’asegurar la pervivencia d’horros, paneres y cabazos”. «Tamos énte un elementu que forma parte de la identidá asturiana, un iconu patrimonial que nos representa como comunidá”, añedió.
La Conseyera tamién destacó que la declaración “da cumplimientu a una de les midíes del Plan del Horru aprobáu en 2023 pola Conseyería de Cultura. En concretu, al oxetivu plantegáu nel plan de llograr la reconocencia de la cultura del horru como manifestación d’interés cultural, impulsando tamién la visibilización y continuidá de les técniques constructives y de los oficios tradicionales venceyaos a estes construcciones».
La Conseyería de Cultura ta trabayando na selección d’un centenar d’horros y paneres pa empecipiar la so declaración como bien d’interés cultural (BIC). L’espediente estatal reconoz espresamente la relevancia del Plan del Horru d’Asturies como referencia na xestión del patrimoniu inmaterial venceyáu a estes construcciones.
Cola aprobación d’esti decretu, que supon toa una reconocencia al patrimoniu rural y a la visibilización de los saberes tradicionales de les comunidaes del norte peninsular, los horros ingresen nel Inventariu Xeneral de Patrimoniu Cultural Inmaterial, del que formen parte 15 elementos patrimoniales, que yá cunten con una distinción como Manifestación Representativa del Patrimoniu Cultural Inmaterial. Ente ellos tán la Selmana Santa, l’alzada o les espresiones culturales venceyaes a la cultura sorda y la llingua de signos española.
Víctor Manuel Suárez, el presidente de l’Asociación del Horru Asturianu, estimó la declaración como «la mayor reconocencia al horru a fecha de güei y el pasu previu para presentar una candidatura a la Unesco como bien cultural inmaterial –nós vamos preparar ensin faer enforma ruiu, pero ensin parar–». Afirmó qu’esi patrimoniu asturianu «tien percorríu» y recordó que «el Plan del Horru ta yá nes últimes rabotaes». «Esperamos que non tarde», manifestó y mentó, nes midíes que contempla, rebaxar del IVA y mayor flexibilidá nel accesu a les subvenciones para costear intervenciones de rehabilitación, la constitución del bancu de «pieces» rescataes de los horros irrecuperables para ser reutilizaes n’actuaciones de restauración. «Hai que tener una reconocencia al Principáu, que se tán entornando», añedió.
Fernando Mora, arqueólogu de l’Asociación, incidió na mesma idea: «Supon un gran llogru. Probablemente sía’l finxu más importante para l’horru nos últimos tiempos, non solo para l’horru sinón para tolo que lo envolubra: los saberes tradicionales, la xente que los usa, que los curia». Punxo de relieve que se trata de «una iniciativa que partió dende la sociedá civil, de la Rede Horrea, y que eses persones veanse reconocíes ye importante».
La reconocencia estatal, añedió, ye «un balón d’osíxenu para’l desenvolvimientu de midíes de protección y salvaguarda» del horru y «va traer la ellaboración de documentos y planes para la protección d’esta cultura». «El propietariu va tener que siguir curiando’l so horru, como siempres, pero esta reconocencia encaxa nel Plan del Horru, abriendo’l camín para la protección, como un elementu vivu y con usos respetuosos», reparó.
