Ferla Megía publica’l videu completu del so conciertu n’Una Señora Fiesta 2025. Inclúi 17 temes ente los que suenen pieces que formen parte de los sos EPs, dalguna versión y rareza, amás d’una collaboración con Tania Pereira. Musicasturiana.com
El sábadu 26 de xunetu Ferla Megía foi parte del cartelu de los conciertos del festival Una Señora Fiesta, eventu que dende’l 2018 enllena Piloña de músiques de raigañu, de vanguardia y d’otres manifestaciones culturales. L’artista multidisciplinar sierense ta acabante d’estrenar na so canal de YouTube el conciertu completu de la so actuación.
Nél suenen 17 temes que tán repartíes ente los dos EPs que’l músicu tien publicaos –Páxaros 01 que Megía llanzó en payares de 2024 y Páxaros 02 qu’asoleyó esti mes d’avientu-; amás de dalguna versión y rareza. Tamién inclúi la collaboración de Tania Pereira nel tema ‘Conseyu’. El trabayu audiovisual ta fechu por Álvaro Armas, mientres que l’equipu técnicu tuvo formáu por Jorge Irazabal y Arturo Rodríguez.
