Clarin.com / Nuevos estudios demuestren que los Tyrannosaurus rex, «el rei de los dinosaurios”, vivieron más de lo que se pensaba. Los xigantes carnívoros podíen pesar hasta ocho tonelaes y creíase qu’algamaben la edá adulta a los 25 años. Trés científicos de la Universidá Estatal d’Oklahoma compartieron afayos qu’indiquen qu’en realidá tardaben hasta 40 años en completar el so desenvolvimientu.
Dende va décades los paleontólogos intenten reconstruyir la vida del Tyrannosaurus rex, consideráu «el rei de los dinosaurios» pol so pimpanu tamañu y capacidá depredadora, por aciu l’estudiu de los aníos de crecedera nos sos güesos -que son similares a los de los árboles-, y hasta agora creíase qu’estos xigantes carnívoros algamaben el so tamañu adultu alredor de los 25 años.
Pero un nuevu y ampliu estudiu, publicáu na revista académica PeerJ, suxure qu’el T. rex crecía en realidá d’una forma más lenta y constante hasta algamar un pesu máximu d’ocho tonelaes, midir hasta 13 metros de llargu y 4 metros d’altor.
La investigación foi liderada por Holly Woodward, profesora d’Anatomía y Paleontoloxía de la Universidá Estatal d’Oklahoma, quien analizó 17 especímenes d’esta especie de dinosauriu, dende xuveniles tempranos hasta adultos de gran tamañu.
Los restos del Tyrannosaurus rex más grande del mundu fueron presentaos
en Canadá en 2019. (Semeya: Amanda Kelley/Universidá d’Alberta)
«Este ye’l conxuntu de datos más grande enxamás arrexuntáu sobro’l Tyrannosaurus rex», aseguró Woodward, convencida de que l’enfoque qu’utilizaron va dexar reconstruyir la hestoria d’una forma inédita.
Por aciu cortes de güesu esaminaos so lluz especial y algoritmos estadísticos avanzaos, l’equipu llogró identificar aníos de crecedera ocultos que nun fueren contabilizaos n’estudios anteriores.
L’analís reveló qu’en llugar d’algamar l’adultez rápido, como se pensaba, esta especie crecía de manera lenta y constante. El coautor del estudiu, Jack Horner, de la Universidá Chapman en California, argumentó: «Una fase de crecedera de cuatro décades puede dexar a los tiranosaurios más nuevos cumplir una variedá de roles ecolóxicos dientro de les sos redolaes».
Los aníos de crecedera del Tyrannosaurus rex y la nueva estimación del so ciclu de vida.
(Semeya: Holly Woodward)
Horner suxurió qu’esti lentu camín escontra’l maduror probablemente dexó a los T. Rex más nuevos cazar preses más pequenes. Esa diferencia podría esplicar el so ésitu como depredadores a la fin del Cretácicu, el tercer y últimu períodu de la Era Mesozoica, que s’estiende dende fai unos 145 millones d’años hasta fai 66 millones d’años.
Les resultancies que llograron indiquen qu’en realidá tardaben hasta 40 años en completar el so desenvolvimientu, lo qu’estendería unos 15 años la fase de crecedera que s’envaloraba hasta agora.
El ciclu de vida de los dinosaurios: los datos inéditos del Tyrannosaurus rex. La investigación tamién ufierta nueves perspectives sobro la variabilidá de tamañu ente los especímenes y plantega la posibilidá de que dellos exemplares primeramente clasificaos como Tyrannosaurus rex pertenezan en realidá a otres especies o subespecies, como’l Nanotyrannus.
Los güesos proveníen d’amueses de tiranosauriu recoyíes de museos de Montana y Dakota del Norte, incluyendo a dellos dinosaurios conocíos a nivel mundial, como los moteyaos «Jane» y «Petey», qu’amosaben patrones de crecedera inusuales.
Un visitante repara la cadarma d’un Tyrannosaurus Rex
nuna amuesa en Singapur. (Semeya: EFE)
Les sos curves de crecedera resultaron estadísticamente distintes de les d’otros individuos, y anque los rexistros ósevos nun dexen afirmar con certidume si pertenecen a otra especie, la evidencia plantega esta posibilidá.
Nathan Myhrvold, matemáticu del Centru de Ciencies de la Salú de la Universidá Estatal d’Oklahoma, coincidió colos afayos: «Interpretar múltiples marques de crecedera bien próximes ente sí ye complicáu».
«Hai evidencia sólida de que los protocolos que s’utilicen davezu nos estudios de crecedera precisen ser revisaos», proxectó Myhrvold.
Esti tipu d’analís sorraya cómo la combinación de técniques de muestreo ampliaes, estadístiques innovadores y lluz polarizada puede ayudar a detectar un nuevu tipu d’aníu de crecedera. Si l’amuesa ampliada n’otros especímenes revela les mesmes resultancies, implicaría la necesidá de reevaluar la hestoria de crecedera d’otros dinosaurios, más allá del Tyrannosaurus rex.
El craniu d’un Tyrannosaurus rex mozu, espuestu nel Muséu de les Predreses
en Bozeman, Mont. Semeya: Millard H. Sharp/Science Source
Los aníos de crecedera de los güesos de dinosauriu son bien difíciles o imposibles de ver cola lluz d’un microscopiu normal, pero colos filtros especiales crearon colores brillosos y contrastes nítidos que revelaron cada aníu con estelantes detalles.
Al cuntar cada marca nos fósiles, incluyíes les llínees desaxeradamente cercanes que se cree que fueron causaes pol estrés, l’equipu d’espertos construyó cuatro métodos de conteo distintos y utilizó modelos d’ordenador pa probar cuál daba la imaxe más consistente del ciclu de vida de los dinosaurios.
El métodu más confiable amosó qu’el T. rex tardaba ente 35 y 40 años n’algamar el so tamañu máximu, en llugar de maurecer a los 20 años. Los científicos creen que mientres el so períodu de crecedera más rápida, ente los 14 y los 29 años, estos depredadores podíen aumentar ente 360 y 550 quilos per añu.
Según un analís anterior publicáu por Science, envalórase que 2.500 millones d’esta especie de dinosaurios terópodos carnívoros vivieron na Tierra fai 66 millones d’años.
Dempués de más d’un sieglu d’investigaciones, el Tyrannosaurus rex sigui sosprendiendo a los científicos. Esti nuevu estudiu podría ufiertar per primer vegada una imaxe completa de la vida d’aquellos xigantes qu’inspiraron la esitosa saga de películes de Jurassic Park: dende los xuveniles que crecíen amodo hasta los xigantes d’ocho tonelaes qu’apoderaron los ecosistemes del Cretácicu tardíu.
