Vamos encarar un llunes marcáu tantu peles nubes, como poles precipitaciones y, especialmente, por un descensu bien importante de les temperatures. Vamos amanecer con cielos yá bien nublos salvu, sía que non, nel sur de la rexón. Asina tou, les nubes rápido van acabase estendiendo por tol cielu asturianu y van dexar precipitaciones débiles que van percorrer la rexón d’occidente a oriente. Van ser más frecuentes mientres la mañana, pero pela tarde tamién van faer actu de presencia, sobremanera nel oriente. A la fin de la tarde nun se refuga l’apertura de dalgún cobarde claru nel sector occidental. Les temperatures van baxar de forma xeneralizada ente 6 y 8 ºC en tol Principáu, con dalgún descensu daqué más moderáu en zones costeres del centru y del oriente. Con éses na mariña van llegase algamar los 19 o 20 ºC a lo sumo, y na mayor parte del interior los 18/19 ºC, cola esceición del suroccidente onde podríen rexistrase les máximes más altes con 21 o 22 ºC n’Ibias por casu. El tiempu va empezar a ameyorar a partir del martes, dando pasu a unos díes que volverán tar soleyeros y con temperatures percima de los 25 ºC con facilidá.
