TPA /
Muyeres del mediu rural piden accesu igualitariu a los servicios, pa poder siguir viviendo nel campu. Comisión de Mediu Rural nel marcu de la tramitación del Estatutu de les Muyeres Rurales.
La Federación Asturiana d’Empresarios (FADE) ve nel Estatutu de les Muyeres Rurales «una ferramienta necesaria p’avanzar n’igualdá», anque considera que pue tener meyores y que tien de dir acompañáu de polítiques actives, instrumentos financieros y midíes de sofitu empresarial que conviertan principios llegales n’oportunidaes tanxibles pa les muyeres.
Nestos términos manifestóse la presidenta de la Federación d’Empresaries y Directives d’Asturies, Begoña Fernández-Costales énte la Comisión de Mediu Rural del parlamentu autonómicu, onde se tramita esti proyectu de llei, que quier impulsar la igualdá de xéneru y desaniciar les barreres que llenden l’accesu de les muyeres que viven nel campu a la formación, l’empléu, l’ociu, la cultura y el deporte.
Pa la presidenta de la Federación Asturiana de Conceyos (FACC), Cecilia Pérez, muyer que desenvolvió cuasi tola so vida nel mediu rural, ye «una iniciativa positiva porque venceya la igualdá al territoriu» y ufierta ferramientes que van ayudar a midir y correxir con datos desagregaos por sexu, indicadores o evaluaciones d’impactu de xéneru.
