Les pites salen del confinamientu: Asturies vuelve dexar la cría en llibertá de pites salvu n’ocho conceyos. Los conceyos nos que va siguir l’encierre pol gripe aviar son Castropol, Corvera, Xixón, Gozón, Ribesella, Tapia de Casariego, A Veiga y Villaviciosa. LNE
Asina lo publicó esti miércoles el Boletín Oficial del Estáu (BOE), d’alcuerdu a una disposición del Ministeriu d’Agricultura, Pesca y Alimentación que dexa ensin efectu parcial les restricciones aprobaes el 11 de payares para frenar la espansión d’esta enfermedá altamente infeiciosa.
El fin d’estes llimitaciones nel restu d’Asturies va dexar, amás de volver a entamar la cría al campu, «celebrar certames, amueses o exhibiciones con aves cautives», según concreta’l Principáu.
Falen los criadores asturianos tres el confinamientu total del pitu caleya y la pites, agora más «estresaes»: «Hai que cumplir, va pasar cuando termine la migración». Sicasí, la Conseyería de Mediu Rural y Política Agraria encamienta «amenorgar el contactu con aves monteses y los sos escrementos, evitar la manipulación d’animales muertos o enfermos y reforzar les midíes de bioseguridad nos gallineros».
El confinamientu obligatoriu foi decretáu’l pasáu 13 de payares de 2025 como midida preventiva énte l’aumentu del riesgu d’espardimientu d’esta enfermedá altamente infeiciosa, coles mires d’evitar el contactu ente aves de corrolada y aves monteses migratories potencialmente portadores del virus.
De magar, les autoridaes realizaron un siguimientu selmanal de la evolución epidemiolóxica. A la vista de la meyora de la situación tanto n’España como nes zones d’orixe de les aves migratories y énte la previsión de temperatures, el Ministeriu consideró oportunu llevantar la restricción de calter xeneral en tol territoriu nacional.
