La gaita celebra’l so día cada vez más cerca de ser declaráu Bien d’Interés Cultural.
La celebración del Día Internacional de la Gaita pon en valir el so enraigonamientu cultural mientres avanza’l procesu pa la so declaración como Bien d’Interés Cultural Inmaterial.
Güei celébrase’l Día Internacional de la Gaita y failo con un actu na Casa de la Cultura de Noreña. Los festexos treslladáronse per primer vegada de Xixón a otru conceyu na que ye yá la so tercer edición.
Nel actu púnxose en valir el trabayu que faen dende’l ‘Conceyu de la Gaita’ por dar puxu a la cultura asturiana y entá ye más nun momentu nel que Cultura estudia declarala Bien d’Interés Cultural.
La conseyera de Cultura, Vanesa Gutiérrez, aseguró que yá tienen tolos documentos pa llevar la midida a la Comisión de Patrimoniu.
Cultura remana una memoria na que se radiografió la gaita, unu de los nuesos símbolos identitarios. Esi estudiu recueye qu’anguaño hai 96 formaciones de gaites. La mayoría n’Asturies, pero 13 tán n’otres comunidaes y 10 nel estranxeru.
Contabilícense unos 3.000 gaiteros na rexón, na que tán afincaos cinco talleres. Otros tantos que construyen gaites asturianes allugaos n’otres comunidaes autónomes. Envalórase qu’esti subsector de la música asturiana xenera unos 4 millones d’euros.
Bien d’Interés Cultural Inmaterial
Nun pierden un res d’una hestoria que se remonta a la civilización griega y que n’Asturies se rastrexó hasta’l sieglu XVI. Los alumnos del Colexu Públicu Condáu de Noreña nun sospechen que primero qu’acabe l’añu, l’instrumentu que nos identifica va ser protexíu como Bien d’Interés Cultural Inmaterial.
Luis Álvarez Pola redactó la memoria que describe les razones pa esta declaración d’un instrumentu que yá xenera riqueza, pero que ye necesario fortalecelu colos estudios cimeros de música. Anguaño solo hai dos estudiantes. El BIC impulsaría la investigación pa que nun se pierda la conocencia. Y faise necesario crear un censu de gaites antigües.
Cultura tien l’informe dende payares, pero entá nun ta incoáu l’espediente. Una vegada que lu abran, van tardar dellos meses hasta que llegue la declaración, y a partir d’entós la gaita asturiana va tener fuelle pa ratu.
