Llega la Recreación pelegrina» de Grau, con escenes y personaxes del final de la Edá Media, mercadón, «sopa boba» y «olla podre» n’El Fresnu. La primer edición d’esti eventu, entamáu pol Conceyu y «Camín de Grau», celébrase’l 27 de setiembre y tán llamaos a participar tolos vecinos y visitantes que lu deseyen. LNE
Grau suma un nuevu eventu a la so programación cultural y d’ociu qu’espera que sía un ésitu y conviértase n’unu más de los reclamos del conceyu. Trátase de la primer «Recreación pelegrina» y va ser el 27 de setiembre, a partir de los once de la mañana, con un programa que s’empecipia nel centru de la villa y conclúi n’El Fresnu. Hasta’l popular santuariu va xubise andando, acompañaos tolos participantes de recreaciones de dómina y personaxes vistíos al detalle, con un vestuariu que foi creáu por Maite Capín, diseñadora en numberoses producciones cinematográfiques de Netflix, Disney, HBO y Amazon y que saltó a la fama pol so trabayu en series tan conocíes como «Xuegu de Tronos».
Los actos d’esta primer recreación moscona van empecipiar a los diez de la mañana na Plaza Xeneral Ponte, onde se va faer el Llamamientu al caminante» para empecipiar la xubida a cuerpu al santuariu d’El Fresnu. Ye opcional dir andando y quien lo deseyen pueden llegase hasta’l templu per otros medios para participar nos actos que darréu se desenvuelvan ellí.
Pel camín va haber representaciones. A les once hores ta previstu l’Entremés de la vienta», de Quevedo, na Vienta del Cuervu, nel encruz de La Llinar, en San Juan de Villapañada. A les 11.30 hores ta previstu’l «Mercadón pelegrín» na redolada del Santuariu y a les 12.30 hores que lleguen al templu los que xuben caminando. Nesi momentu va tener llugar la Ceremonia del zurrón y bordón».
Grau apuesta con esta iniciativa pola puesta en valor d’una de les sos realidaes culturales como pasu y parada del Camín de Santiago Primitivu, una circunstancia qu’amás anguaño revitaliza económicamente la villa, con miles de pelegrinos que traviesen, fuelguen o pernoctan na capital, lo que ta dando llugar al surdimientu de negocios y creación d’empléu local en redol a los agospiamientos, y a los establecimientos de comida para llevar.
