L’arte del xixonés Edgar Plans da’l saltu a la porzolana de Lladró. L’artista va presentar la collaboración cola marca valenciana n’Art Basel Hong Kong con una figura inspirada nel so padre. El Comercio
L’arte d’Edgar Plans nun entiende de llendes formales, estéticos nin creativos. Tampoco materiales, pos para’l so últimu proyectu embarcóse nel viaxe de combinar artesanía y vanguardia dando vida a unu de los sos pequeños Animal Heroes en porzolana de Lladró.
Llámase ‘Juanin and his martian’ y debuta esti vienres nel mercáu internacional, nun llugar del planeta tan escepcional para faelo como ye Hong Kong mientres la selmana d’Art Basel, la feria d’arte contemporaneo más influyente del mundu. L’artista xixonés sabe qu’ellí s’aprecia enforma’l so trabayu, que n’Asia «gusten enforma les temes que tratu, el coloríu y los personaxes», esplica, y que los visitantes «vense bien reflexaos, como neños pequeños y soñadores, colos persdonaxes que faigo».
‘Fat land’, de 180 x 146 cm
Hasta ellí movióse, amás de para presentar al mundu estes pequenes figures de porzolana, para participar n’Art Basel al pie de la so galería na rexón, Tang Contemporary Art. Nun ye la so primer vegada nesta cita col mercáu y nesta ocasión va aprovechar para presentar cuatro pieces úniques que dexen asomase a les sos moliciones creatives más recién.
La primera, llamada ‘Fat Land’, ye un llenzu de más d’un metro d’altu y casi dos d’anchu «qu’alude al mundu del colesterol y los alimentos non saludables, pero que nos faen felices», describe l’artista. La segunda pieza que viaxa con él fala de «un cuadiernu de notes sobro temes de café» y, a lo último, acompáñen-y dos pequenos llenzos de personaxes sobro nubes, como’l delicáu ‘Balloon boy’, que puede vese so estes llínees reparando cómo’l so globu escápase de les llendes del marcu.
‘Balloon boy’
La collaboración con Lladró, un proyectu que-y dexó esquizar un material histórico para arriquecelo col so toque vanguardista, foi una iniciativa de la popular marca de porzolana: «Tán faciendo una edición con artistes y pensaron nel mio trabayu», esplica Plans.
«Lo primero que pensé foi neses escultures de tola vida que tienen los mios padres en casa», tan enraigonaes na cultura popular, pero que nos últimos tiempos esviáronse temáticamente escontra imaxes más contemporanees. Ello ye que Lladró cuenta con un programa llamáu Art Editions dedicáu a la creación de series d’autor en porzolana.
Artistes como Leandro Erlich y Javier Caleya yá llanzaron ellí les sos propies colecciones y l’empresa cunta con diseños de marques como Star Wars, Warner Bros. o Disney, polo que Plans llueu se dio cuenta de que les sos obres encaxaríen nel proyectu a la perfección. «Convidáronme a Valencia a ver cómo se faía tou y gustóme enforma la idea y el proyectu», desvela l’artista. «Y con el cuidu col que lo faen tou y el nome que tienen, pensé que qué menos que faer esto con una marca española d’esi nivel».
Ensin barreres para suañar. Asina s’embarcó nesta pequena aventura de porzolana que fala de la so familia, de los sos suaños y de lo importante que ye para él dexar espaciu a la inspiración. La figura principal «ye un personaxe que ta bien influyíu polo que yera’l mio padre», l’escritor xixonés Juan José Plans. «Y por tolo qu’él m’enseñó a mi: a pensar y a suañar, a ser llibre».
Por eso’l pequeñu Animal Hero que creó esta vegada asitiase sobro un bloque de fueyes en blancu: porque tien tol futuru por escribir. «La idea ye que tolos tos suaños pueden realizase y tienes que vivir la to propia hestoria, non la de los demás», esplica. «Como’l mio padre siempres tuvo dientro del mundu de la lliteratura y de la cultura y siempres me ayudaren a creer nel mio trabayu, ye l’homenaxe que quiero fae-y». Asina, al llau d’esti pequenu héroe de porzolana que toma’l nome del so padre, atópase un marcianu sobro unos lápices que representa «que’l mundu nun ye abondu, que ye l’universu’l qu’inspira. Que nun hai barreres nin fronteres a la de pensar ya imaxinar otros mundos».
La collaboración con Lladró va tener percorríu más allá de Hong Kong y de esta primer edición de solu venticinco unidaes decoraes, caúna d’elles, d’una manera única. «Depués, va presentase otru personaxe más pequeñín», adelantra Plans, y entá va haber un cuartu, «que ye’l marcianu qu’agora ta sobro los lápices», y que tamién va tener el so protagonismu de manera individual.
