Eva Ledo destaca la crecedera del proyectu Educastur Radiu y l’implicación de la comunidá docente. La conseyera participó nel IES Virxe de Cuadonga, de L´Entregu/L’Apurro, nes actividaes del Día Mundial de la Radio. Actualidá /
La conseyera d’Educación, Eva Ledo, destacó güei “l’enclín a l’alza y l’implicación activa de la comunidá docente” nel proyectu Educastur Radiu, que’l so portal dixital ta consolidándose como l’espaciu de referencia para allugar los conteníos radiofónicos producíos nos centros d’enseñanza del Principáu.
Ledo participó nes actividaes del Día Mundial de la Radio, que se celebraron nel institutu Virxe de Cuadonga, de L´Entregu, y qu’entamaron el Centru de Profesoráu y Recursos (CPR) de Xixón y el profesoráu de la rede RqueR. Tamién tuvieron presentes l’alcalde de Samartín del Rei Aurelio, José Ramón Martín; la directora xeneral d’Inclusión Educativa y Ordenación, María Dolores Bueno, y el director del institutu, Mauro Díaz.
La conseyera defendió l’usu de la radio escolar como “una ferramienta pedagóxico innovadora qu’impulsa la creatividá, la espresión oral o’l pensamientu críticu”. Mentó, amás, la so contribución al trabayu n’equipu y a la convivencia ente profesoráu y alumnáu.
Na web Educastur Radiu participen de forma activa 52 centros educativos y hai más de 60 docentes que solicitaron la collaboración y coordinación col portal. Coles mesmes, la plataforma alluga 112 episodios de distintos formatos anque los más habituales son entevistes, monográficos, proyectos d’aula o magacinos.
El portal amplió apocayá les sos secciones p’asegurar la representatividá de toles etapes educatives, cola inclusión d’un apartáu d’Adultos y Formación Profesional. Y, en feches próximes, prevese la incorporación de la etapa d’Infantil, cola que se va completar el ciclu educativu.
El proyectu Educastur Radiu empezó nel cursu 2023-2024 con unes xornaes formatives nes que participaron 132 centros d’enseñanza, lo que supon un 31% de la rede autonómica. Los asistentes recibieron unos kits de radiu pa poder poner en marcha la so propia emisora escolar.
