Vamos amanecer el domingu con nubosidá de tipu baxu que rápido va dir sumiendo para dar pasu a un mayor protagonismu del sol que va rellumar en prácticamente tol Principáu a mediudía. Pero, a lo llargo de la tarde, vamos dir reparando como van dir entrando nubes pol noroeste que se van dir estendiendo por tola rexón. Ello ye que nun se refuga que pueda escapase dalgún orbayu a la fin de la tarde o, siquier, pela nueche. Los vientos van predominar de noroeste-oeste con raches moderaes na mariña mientres casi tol día, y fluexos nel interior sacantes pela tarde cuando tamién podríen dase delles raches daqué más significatives. Tocantes a les temperatures, les máximes van ser bien similares salvo n’altes zones de monte onde podríen baxar llixeramente. Les mínimes nun van variar salvu de forma local en zones del interior onde van baxar, a lo sumo, 1 ºC respectu al sábadu.
El llunes va ser un día con cielos cubiertos y precipitaciones débiles pero xeneralizaes. Esta inestabilidá va ser más frecuente mientres la mañana. Les temperatures van baxar en tol Principáu hasta 4 o 5 ºC polo que claramente nun va ser un día nin tanto veraniegu. A partir del martes van empezar a recuperase les temperatures.
