Foi un activista d’una llingua que, como dicía n’»Hestoria universal de Paniceiros», “mui pocos falen” y “que munchos menos lleen”.
- Per equí hebo un crimen famosu va años, ¿nun ye asina?
Yera asina. Nenguno, sicasí, que recuerde la memoria de los asturianos d’anguaño. Ablucada pola conesión que Xuan Bello pudiera tener con aquel sucesu vulgar, pero mui comentáu na prensa del primorriverismu, quise saber, y él, que yo supiera. Había, dicía, un llibru mui raru, malpenes conocíu, que cuntaba’l casu; a él, que lo lleera cuantayá, llamára-y la atención porque nun par de frases de la noveluca, pronunciaes por un funcionariu castellán que nun yera a entender l’idioma, esti duldaba de si l’asturianu nun sedría un idioma inventáu pa obstaculizar les investigaciones policiales.
- Va muncho que lu lleí, dixo.- Si recuerdo’l títulu, escríbote con él.
Nun llegó a recordalo, pero va poco qu’alcontré esi rarísimu exemplar y pude cerciorar que la memoria nun-y fallara: asina, puntu per puntu, yera la referencia; asina, sabiu y xenial, memoria viva de tolo que tuviera que ver cola cultura asturiana y n’asturianu, yera Xuan.
Xuan yera un home sabiu, una mente privilexiada y una pluma a la que tovía-y quedaba muncha tinta por escribir
Mesmo qu’un día alcontré nuna llibrería de vieyu l’exemplar que mento n’esta historia, va unes selmanes pude atopar tamién un primer exemplar de Nel cuartu mariellu, el poemariu col que Xuan Bello, sol alcuñu “Bello Fernán”, inicióse nel panorama lliterariu asturianu. Foi en 1982; él, precoz y xenial, nun tinía más de 16 años. Aquella foi la primera de munches obres imprescindibles pa entender Asturies y pa entender el so idioma, esi pol que tanto lluchó.
“Siempres me moví ente dos mundos”, dicía nuna entrevista, va años, “ente l’ayeri y el mañana, ente la llingua asturiana y la castellana, ente una patria que nun servía de muncho y otra que yera una estafa”. A esa patria piquiñina supo, sicasí, facela eterna con Hestoria universal de Paniceiros, obra cimera de la so prosa y ún de los cumales de la lliteratura entera asturiana.
Nun foi solo eso, nin tampoco’l cronista del Uviéu abiertu recién a la democracia de Al Dios del llugar. Bello, Premiu Nacional de Lliteratura Asturiana nel 2017, tamién sofitó activamente la creación lliteraria per mediu de la espublización de revistes como Adréi, fundada xunto a Berta Piñán y Esther Prieto; vindicó la cultura a tolos niveles nel programa de TPA Clave de fondo y vistió de calidá lliteraria, per mediu de les sos collaboraciones na prensa xeneralista, l’anguaño mui maltrechu mundu de la información.
