Esperamos cielos nublos yá dende pela mañana salvu nel terciu sur y suroccidente asturianu. Comoquier, a lo llargo del día, la nubosidá acabará estendiéndose a tola rexón. Les nubes van dexar orbayos pocu importantes mientres la xornada. Van empezar afectando a puntos costeros, pero dirán enfusándose escontra l’interior col intre de les hores. Los vientos van ser fluexos polo xeneral, predominando de nordeste de primeres, anque se van afitar de norte mientres el día. Les temperatures máximes van baxar de forma xeneralizada. Dichu descensu va ser d’hasta 5 o 6 ºC nel interior, ente que na mariña la baxada de les temperatures va ser más moderada.
El vienres tamién esperamos abondosu nubosidá con precipitaciones que van ser frecuentes pela mañana y podríen afectar a cualquier puntu del Principáu. A lo llargo de la tarde, sobremanera nel tramu final, podrán abrise escamplaes nel cielu tanto nel occidente como na mariña. Asina tou, les precipitaciones entá podríen tar presentes nel oriente y nel cordal. Les temperatures van siguir baxando nel interior.
