Actualidá / Asturies afita la meyora del mercáu llaboral: empecipia 2026 con 8.321 persones más con trabayu y casi 2.000 menos en paru que va un añu 05
de xineru de 2026. El Principáu rexistra n’avientu la cifra más baxa de desempléu de tola serie histórica y el mayor númberu d’afiliaciones dende 2008.
Asturies afitó la meyora del mercáu llaboral a lo llargo del últimu añu. Colos últimos datos oficiales, el Principáu empecipia 2026 con 51.197 persones en paru, la cantidá más baxa de tola serie histórica. Les afiliaciones foron 395.403, el mayor númberu dende 2008.
Con estos númberos, Asturies empieza xineru con 8.321 persones más con trabayu y unos 2.000 paraes menos que va un añu. Estos datos son positivos pese al llixeru repique del paru (201 persones, un 0.39%) rexistráu’l mes pasáu al respective de payares: la comparancia interañal constata que’l númberu de paraos n’Asturies suma yá 57 meses consecutivos de descensos y avérase a cinco años de baxaes ensin interrupción.
La meyora del mercáu llaboral en 2025 foi xeneralizada: en dambos sexos, en tolos grupos d’edá y para tolos sectores d’actividá, incluyíu’l colectivu de quien apuerten per primer vegada a un empléu. Nel mes d’avientu, la mayor baxada de paru rexistrose nel colectivu de muyeres y menores de 25 años.
La directora xeneral del Sepepa, Begoña López, valoró de forma positiva esta meyora. López destacó especialmente qu’avientu rexistrara’l menor númberu de persones en paru de la serie histórica y que l’afiliación a la Seguridá Social siga avanzando escontra los 400.000 emplegaos.
López destacó les acciones que ta desenvolviendo’l Sepepa para ameyorar les polítiques d’empléu n’Asturies, como la formación a la carta para empreses y los planes d’empléu, que van arrincar nes próximes selmanes y van facilitar la contratación de unes 500 persones.
