Les mayores cayíes demográfiques tán en Morcín, Castropol y Tapia. L’Asturies despoblada ta instalada nel ‘iviernu demográficu’. Los ayuntamientos menos poblaos siguen perdiendo habitantes a pesar de les deducciones impulsaes pol Principáu.
Namás 11 de los 50 conceyos con menos de 5.000 habitantes algamen sumar vecinos. Les mayores cayíes demográfiques tán en Morcín, y la costa occidental con Castropol y Tapia a la cabeza, que pierden cuasi mediu centenar d’habitantes.
La mayor sangría demográfica cébase, precisamente, nos conceyos más deshabitaos. Hai 18 conceyos con menos de 1.000 habitantes. Namás dos, Onis y Proaza, medren el so censu. El restu siguen a la baxa. Sobre manera sangrante ye’l casu d’El Valle Altu de Peñamellera, y Grandas de Salime y Taramundi, otra vez nel occidente.
La mayor parte de la población de los conceyos en riesgu de despoblamientu ta mui avieyao. Pa dalgunos vecinos, d’El Valle Altu de Peñamellera, la falta d’oportunidaes llaborales y la falta de servicios básicos, como un centru de salú o una tienda, amuesen esti abandonu del mediu rural.
Nel occidente, la falta de vivienda asequible y disponible tol añu, en conceyos de gran ocupación vacacional, como Tapia, torga que s’asienten les families. Amás, el conceyu, onde se rexistren unos 14 nacimientos al añu, tampoco cunta con escuela de 0 a 3.
Castropol apuesta pola vivienda asequible. En concreto pa 43 families. Según el censu municipal, perdió 48 habitantes. N’A Veiga, onde sí medró la población, confíen en caltener esta tendencia, por exemplu cola llegada d’inmigrantes.
Iniciatives pa devolver la vida a los pueblos más allá de los fines de selmana y les vacaciones.
